Венесуэладағы зілзаладан қайтыс болғандар саны 1000-ға жуықтады
Венесуэладағы жер сілкінісінен 920 адам қайтыс болды. Тағы 3360 адам жарақат алды. Бұл туралы Венесуэладағы Ұлттық ассамблея төрағасы Хорхе Родригес айтты деп жазады ВВС.
Биліктің дерегінше тағы кем дегенде 177 адам қиранды астында жатыр. Кей өңірде ондаған адамды үйінді астынан аман алып шыққан. БҰҰ 50 мыңнан аса адам із-түссіз жоғалған деп отыр.
Елдегі ауруханалар өз мүмкіндіктерінің шегінде жұмыс істеп жатыр. Бірақ ВВС жазуынша, зілзалаға дейін де елде дәрігерлер мен дәрі-дәрмектер тапшы еді. Табиғи апаттан кейін бұл мәселе тіпті айқын біліне бастаған.
Бұған дейін ел президентінің міндетін атқарушы Хорхе Родригес 235 адам қаза тауып, 4,5 мың адам жараланды деп мәлімдеген.
Халықаралық көмек
Венесуэла мемлекеттік телеарнасының мәліметінше, 26 маусымда Швейцариядан 80 құтқарушы мен 18 тонна гуманитарлық көмек келді. Топ құрамында ит жетектеген кинологтар да бар. Айта кету керек, жер сілкінісінен кейін шұғыл көмек ұсынған алғашқы елдердің бірі Швейцария болды.
Одан бөлек Мексика мен Латын Америкасының басқа да елдерінен де көмек жіберілген.
Еуропалық комиссия төрағасы Урсула фон дер Ляйеннің айтуынша, іздестіру-құтқару бөлімшелерін Италия, Чехия, Франция, Германия, Люксембург, Португалия және Нидерланды да жіберіп жатыр.
Еске салайық, 25 маусымда таңертең Венесуэланың солтүстік-орталық бөлігінде жойқын зілзала болды. АҚШ геологиялық қызметінің (USGS) мәліметінше, әуелі магнитудасы 7,2 балдық, содан ізін сала 7,5 балдық екі ірі дүмпу тіркелген.
