Қырғызстан соты Қамшыбек Ташиевке үкім шығарды

Бішкектің Бірінші май аудандық соты «75-тің хаты» деп аталатын қылмыстық іс бойынша үкім шығарды. Іс бойынша басқалармен қатар Қырғызстанның мемлекеттік ұлттық қауіпсіздік комитетінің бұрынғы төрағасы Қамшыбек Ташиев те айыпталған, деп хабарлайды 24.kg.

Тәшиевтен бөлек, айыпталушылар орындығында бұрынғы бас прокурор Құрманқұл Зулушев, парламенттің бұрынғы спикері Нұрланбек Тұрғынбек уулу, қоғам қайраткері Бекболот Талгарбеков, ішкі істер министрінің бұрынғы орынбасары Құрсан Асанов, парламенттің бұрынғы депутаты Құрманбек Дыйканбаев, бұрынғы вице-премьер әрі бұрынғы депутат Аалы Қарашев және Қырғызстанның Өзбекстандағы бұрынғы елшісі Эмилбек Ұзақбаев болды.

Сот талқылауы жабық режимде өткенімен, үкім жария түрде оқылды.

Іске қатысушылардың барлығы «Билікті күшпен басып алу» бабы бойынша кінәлі деп танылып, мүлкі тәркілене отырып, төрт жылға бас бостандығынан айыру жазасына кесілді.

Сонымен қатар, сот айыпталушыларды «Лауазымдық өкілеттігін асыра пайдалану» бабы бойынша ақтады.

Сот сотталғандарға қатысты үш жыл мерзімге пробациялық бақылау қолданды. Осылайша, олардың ешқайсысы жазасын колонияда өтемейді.

МҰҚК бұрынғы басшысы Қамшыбек Ташиевтің адвокаты Икрамидин Айткулов үкіммен келіспейтінін және оған шағым түсіруге ниетті екенін мәлімдеді.

Іске қатысушылардың өз кінәларын бәрібір мойындамағаны хабарланды.

Еске сала кетейік, Қамшыбек Ташиев билікті күшпен басып алуға дайындалу және қызметтік өкілеттігін асыра пайдалану баптары бойынша айыпталып отыр.

Адвокат қылмыстық істің мән-жайы бойынша қаралу үшін Бішкек қаласының Бірінші май аудандық сотына берілгенін мәлімдеді. ҰҚМК-нің бұрынғы басшысымен бірге іс бойынша тағы жеті айыпталушы бар.