Ұлттық құрамадан кеткен Талғат Байсуфинов жаңа қызметке тағайындалды
Павлодарлық «Ертіс» футбол клубының жаттықтырушылар штабында елеулі өзгерістер орын алды. Маусымның соңына дейін Қазақстан ұлттық құрамасының бұрынғы бас бапкері Талгат Байсуфинов команданың кеңесшісі болып тағайындалды. Бұл туралы клуб директоры Мұрат Тілешев айтып, Нұрбол Жұмасқалиевтің қызметтен кету себебін түсіндірді.
Жұмасқалиев неліктен қызметінен кетті?
Клуб директоры Мұрат Тілешевтің айтуынша, өз алаңында өткен матчтан кейін Нұрбол Жұмасқалиев отбасылық жағдайына байланысты оны қызметінен босатуды сұрап, басшылыққа өтініш білдірген.
Клуб басшылығы маманды шешімін өзгертуге көндіруге тырысқанымен, бірнеше рет болған әңгімелесуден кейін оның өтінішін қанағаттандыруға мәжбүр болған. Айта кетейік, Жұмасқалиев «Ертісті» шамамен бір жарым ай ғана басқарды. Оның жетекшілігімен команда 6 матч өткізіп, 4 рет тең түсіп, 2 рет жеңіліске ұшырады.
Байсуфинов командаға көмектеседі
Маусым аяқталғанға дейін павлодарлық футболдың түлегі әрі Қазақстан құрамасының экс-бас бапкері Талгат Байсуфинов жаттықтырушылар штабының кеңесшісі ретінде қызмет атқарады.
Байсуфинов үшін бұл өзіне жақсы таныс туған клубына қайта оралу болып есептеледі. Оның басқаруымен «Ертіс» өзінің қазіргі тарихындағы ең үздік кезеңдерінің бірін өткізген.
2010 жылы команда Қазақстан чемпионатының қола жүлдегері атанды. 2012 жылы ұлттық біріншіліктің күміс жүлдесін иеленіп, Қазақстан Кубогының финалына дейін жетті.
Клуб өкілдері тәжірибелі маманның жаттықтырушылар штабына спорттық мәселелер бойынша қолдау көрсетіп, команданың осы бір қиын кезеңнен өтуіне көмектесетінін атап өтті.
Жаңа жаттықтырушылар штабы
Павлодарлық ұжымның жаңа бас бапкері болып Марат Еслямов тағайындалды, ал оның ассистенті қызметін Иван Азовский атқарады. Бұл екі маман да бұған дейін Қазақстан ұлттық құрамасының жаттықтырушылар штабында жұмыс істеген.
Сонымен қатар, қақпашыларды даярлау жұмысына «Ертістің» аңызға айналған голкипері Юрий Ишутин жауапты болады.
Қазақстан Премьер-лигасының 15 турынан кейін павлодарлық «Ертіс» еншісінде небәрі 10 ұпай бар. Қазіргі уақытта команда турнирлік кестеде 15-ші орында тұр. Жанкүйерлер жаңа келген бапкерлер құрамы команданы төменгі сатыдан алып шығады деп үміттенеді.
Еске сала кетейік, Қазақстан ұлттық құрамасының бас бапкері Талғат Байсуфинов 22 маусым күні қызметінен кеткен еді. Федерацияның президенті Марат Омаров бас бапкердің кеткен себебін түсіндірді.
