Жоғары оқу орындарына түсу үшін ҰБТ-дан ең азы қанша алу керек

Ғылым және жоғары білім министрі Жоғары оқу орнынан кейінгі білім беру ұйымдарына оқуға қабылдаудың үлгілік қағидаларына өзгерістер енгізді. Тиісті бұйрық 2026 жылғы 18 шілдеден бастап қолданысқа енгізіледі.

Құжатқа сәйкес, білім беру грантын тағайыну конкурсына қатысу немесе ақылы негізде оқуға түсу үшін жоғары оқу орнының санаты мен дайындық бағытына байланысты ҰБТ-ның ең төменгі шекті баллдары сақталады.

Сонымен, ұлттық жоғары және жоғары оқу орнынан кейінгі білім беру ұйымдарына түсу үшін кемінде 65 балл жинау қажет. Бұл ретте «Педагогикалық ғылымдар» бағыты үшін шекті деңгей — 75 балл, «Денсаулық сақтау» — 70 балл, «Құқық» — 75 балл, ал «Ауыл шаруашылығы және биоресурстар» және «Ветеринария» бағыттары үшін кемінде 50 балл болып белгіленді.

Биыл жаңадан құрылған және білім беру қызметімен айналысуға лицензия алған ұлттық жоғары оқу орындары үшін ең төменгі шекті деңгей 50 баллды құрайды. Сонымен қатар, педагогикалық, медициналық және заң мамандықтары үшін жоғары талаптар сақталады — тиісінше 75, 70 және 75 балл.

Басқа жоғары оқу орындары үшін ең төменгі өту балы 50 балл деңгейінде қалады, алайда педагогикалық, медициналық және заң білім беру бағдарламаларына түсушілер үшін де жоғары шекті мәндер қарастырылған.

Құжатта 2026 жылғы 1 қыркүйектен бастап талапкерлер жоғары оқу орнына қосымша емтиханды сәтті тапсырған немесе түсушілерді ранжирлеу нәтижелерін ескере отырып, нақты оқу орны дербес белгілей алатын өту балына жеткен жағдайда қабылданатыны қарастырылған.

Бұдан бөлек, «Қазақстан тарихы» пәні, ҰБТ-ның екі бейіндік пәні және шығармашылық емтихан бойынша кемінде 5 балл, ал «Оқу сауаттылығы» және «Математикалық сауаттылық» пәндері бойынша кемінде 3 балл жинау қажет.

Өзгерістер қысқартылған білім беру бағдарламалары бойынша түсуші тұлғаларға да қатысты. Колледж түлектері ҰБТ нәтижелері бойынша кемінде 25 балл, ал «Педагогикалық ғылымдар» бағыты бойынша кемінде 35 балл болған жағдайда білім беру гранттары конкурсына қатыса алады. Бұл ретте ҰБТ-ның әрбір пәні мен шығармашылық емтихан бойынша кемінде 5 балл жинау қажет.

ҰБТ-ны электрондық форматта тапсырған кезде талапкер белгіленген талаптарға сәйкес келетін екі тестілеу нәтижесінің бірімен конкурсқа қатыса алады.

Жекелеген нормалар мерзімді әскери қызметін өткерген азаматтарды қабылдау тәртібін реттейді. Әскери қызметтен кейін екі жыл ішінде олар «Педагогикалық ғылымдар» бағытындағы білім беру бағдарламаларын қоспағанда, ҰБТ-сыз, әңгімелесу нәтижелері бойынша ақылы негізде түсе алады. Осындай тәртіп қысқартылған білім беру бағдарламаларына түсу үшін де қарастырылған.

Сондай-ақ құжатта эксперименттік білім беру алаңдары шеңберінде ақылы негізде қабылдау ҰБТ нәтижелерін есепке алмай – әңгімелесу қорытындысы бойынша жүзеге асырылуы мүмкін екендігі бекітілген.

Сонымен қатар, жоғары оқу орындары қосымша, арнайы немесе шығармашылық емтихандар аяқталған күні олардың нәтижелерін Ұлттық тестілеу орталығының цифрлық жүйесіне беруге міндетті. Құжаттар қабылданғаннан кейін жоғары білім беру ұйымының басшысы оқуға түскендерді қабылдау туралы бұйрық шығарады.

Сонымен бірге бұйрықпен магистратураның білім беру бағдарламалары бойынша оқуға қабылдаудың үлгілік қағидаларына өзгерістер енгізілді.

Құжат 2026 жылғы 18 шілдеден бастап қолданысқа енгізіледі.