Freedom Bank әмбебап банк лицензиясын алды

Freedom Bank қазақстандық банктер арасында бірінші болып әмбебап лицензия алды. Құжатты Қаржы нарығын реттеу және дамыту агенттігі тапсырған.

2026 жылдың қаңтар айында күшіне енген жаңа заңға сәйкес, бүкіл екінші деңгейлі банктер алты ай ішінде өз жұмысын қайта құрып, лицензияларын жаңартуға тиіс. Нарық қатысушылары алдында екі таңдау бар: әмбебап лицензия алу немесе белгілі бір шектеулері бар базалық лицензиямен шектелу.

Жаңадан енгізіліп жатқан қос деңгейлі жүйе банктердің мүмкіндіктерін айқын ажыратып береді. Егер банк базалық лицензиямен қалса, оған бейрезиденттер мен өзімен байланысты тұлғаларға кредит беруге, туынды қаржы құралдарымен (деривативтермен) жұмыс істеуге, шетелдік активтерге инвестиция салу және күрделі трансшекаралық операцияларды жүргізуге тыйым салынады.

Ал әмбебап лицензия банкке тек бұрынғы жұмысын жалғастыруға ғана емес, жаңа қызмет түрлерін ашуға мүмкіндік беріп отыр. Біріншіден, банк бағалы металдар нарығына еркін шығады. Ол құйма алтын мен бағалы металдардан жасалған монеталарды сатып алу, кепілге қабылдау, есепке алу, сақтау және қайта сатуға құқылы.

Сонымен қатар жеке және заңды тұлғалар үшін арнайы металл шоттарын ашып, жүргізе алады. Бұл шоттарда клиенттердің иелігіндегі тазартылған бағалы металдар мен монеталардың нақты физикалық мөлшері көрсетіліп тұрады.

Тағы маңызды жаңалық – әмбебап лицензия тұрғын үй құрылыс жинақтары жүйесіне қатысуға рұқсат береді. Осы уақытқа дейін бұл нарықта мемлекеттік монополия сипаты басым болса, енді Freedom Bank тұрғын үй құрылыс жинақтарына салымдар қабылдап, салымшылардың шоттарын ашу және жүргізуге ресми рұқсат алды.

Бұған дейін Freedom Bank тұрғын үй жинақ жүйесі бойынша жеке ипотека бағдарламасын іске қосатынын хабарлаған.