Ұлттық банк «BURABAY» және «SYǴANAQ» коллекциялық монеталарын сатылымға шығарады
Қазақстан Ұлттық банкі айналымға бірден үш жаңа коллекциялық монета шығарады. Монеталар 2026 жылғы 20 шілдеден бастап KazCoins ресми интернет-дүкені арқылы сатылымға шығады.
Жаңа серияға мына монеталар енді:
- «Қазақстанның інжу-маржандары» сериясынан – BURABAY;
- «Қазақстанның ежелгі қалалары» сериясынан – SYǴANAQ;
- «Есте қалатын оқиғалар мен біртуар адамдар» сериясынан – «ТМД-ға 35 жыл».
Барлық монета Қазақстан теңге сарайында шектеулі таралыммен шығарылған.
Қандай монеталарды сатып алуға болады
Жаңа сериядағы ең ерекше монета – Бурабайға арналған BURABAY коллекциялық монетасы. Бурабай – еліміздің басты табиғи көрікті жерлерінің бірі ретінде бағаланып, ең танымал туристік мекенге айналды.
«BURABAY» монетасы түрлі-түсті баспа және интерференциялық құбылмалы қабат қолдану технологиясымен 925 сынамалы күмістен дайындалған. Салмағы – 31,1 грамм, өлшемі – 45х30 мм, дайындау сапасы – «рrооf». Номиналы 1 000 теңгелік туынды 2 000 (екі мың) дана таралыммен шығарылды. Ол түрлі түсті баспа элементтерімен және арнайы кемпірқосақ түстес қорғаныш жабынмен безендірілген.
Екінші жаңа монета – Ұлы даладағы ортағасырлық ірі қалалардың бірі Сығанаққа арналған SYǴANAQ.
Монета 925 сынамалы күмістен жасалып, алтын жалатылған. Салмағы – 24 грамм, диаметрі – 37 мм, дайындау сапасы – «рrооf».
Оның таралымы одан да аз – бар болғаны 1 мың дана.
Үшінші монета 2026 жылдың желтоқсанында атап өтілетін ТМД-ның 35 жылдығына арналған.
Ол да күмістен жасалып, түрлі-түсті баспа технологиясы қолданылған. Салмағы – 31,1 грамм, диаметрі – 38,61 мм, дайындау сапасы – «рrооf». Монетаның таралымы – 1 мың дана.
Бұған дейін Ұлттық банк Қазақстан Парламентінің 30 жылдығына арналған коллекциялық күміс монетаның сатылымға шығатынын жариялаған болатын.
