Ақмоладағы Көбейтұз көліне бару шектеледі

Ақмола облысында Көбейтұз қызғылт көліне бару уақытша шектеледі, деп хабарлады аймақ әкімдігі. Көл ерекше қорғалатын табиғи аумақ мәртебесін алады.

«Президент Қасым-Жомарт Тоқаевтың тапсырмасы бойынша өзінің ерекше қызғылт түсті суымен танымал көл ерекше қорғалатын табиғи аумақ мәртебесін алады. Ол үшін «Бұйратау» мемлекеттік ұлттық табиғи паркінің шекарасы кеңейтіледі – оның құрамына Көбейтуз акваториясы да кіреді. Бұл көлдің бірегей экожүйесін қорғауды қамтамасыз етуге мүмкіндік береді», – делінген хабарламада.

Сондай-ақ, жағалау аумағын абаттандыру жоспарлануда. Көлдің жанынан бақылау алаңы мен тұрақ жабдықталады. Бұл ретте, жұмыстарды жүргізу кезінде су қоймасына бару шектеледі.

«Жағалау сызығына жақындауға және іргелес аумақта ұсынылған аймақтан жақын тұруға жол берілмейді. Көлге кіреберістерде тәулік бойы жұмыс істейтін бекеттер ұйымдастырылады, аумақты патрульдеуді полиция уәкілетті органдармен бірлесіп қамтамасыз етеді», – деп ескертті әкімдік.

Сонымен қатар, көлге шомылуға және жағадан тұз жинауға үзілді-кесілді тыйым салынды. Табиғи ресурстар және табиғат пайдалануды реттеу басқармасы судың гидрохимиялық қасиеттерін зерттеді.

Нәтижелерге сәйкес, бірнеше зат бойынша шекті рұқсат етілген концентрациядан асып кету анықталды:

• аммонийлі азот;
• аммиак;
• хлоридтер;
• мышьяк;
• сульфаттар және басқалар.

Әкімдік аймақ тұрғындары мен қонақтарынан талаптарды сақтауды және қоршаған ортаға ұқыпты қарауды сұрайды.