Шымбұлаққа апаратын жол қараша айының соңына дейін жартылай жабылады

24 шілдеден бастап Медеу – Тұйықсу жолында көлік қозғалысына шектеу енгізіледі. Осыған байланысты Шымбұлаққа автокөлікпен бару уақытша қиындайды.

Жолда жоспарлы жөндеу жұмыстары жүргізіледі

2026 жылғы 24 шілде мен 30 қараша аралығында Медеу – Тұйықсу автожолында инженерлік инфрақұрылымды жаңғырту бойынша жоспарлы жұмыстар жүргізіледі. Мамандар инженерлік желілерді жаңартып, олардың жұмыс тұрақтылығын жақсартуды және Шымбұлақ шатқалындағы нысандардың үздіксіз жұмысын қамтамасыз етуді жоспарлап отыр.

Көлік қозғалысына шектеу қойылады

Жөндеу жұмыстары кезінде Медеу – Тұйықсу жолымен көлік қозғалысы шектеледі. Бұл шаралар қауіпсіздікті қамтамасыз етуге, арнайы техниканың кедергісіз жұмыс істеуіне және жөндеу жұмыстарын белгіленген мерзімде аяқтауға мүмкіндік береді.

Десе де жол толық жабылмайды. Жедел және апаттық қызмет көліктері, шатқал тұрғындары, сондай-ақ арнайы техника өтуіне рұқсат етіледі.

Шымбұлақ жұмысын жалғастырады

Шектеулерге қарамастан, Шымбұлақ шатқалындағы туристік нысандар келушілерді әдеттегі режимде қабылдай береді. Яғни демалыс орындарына баруға, серуендеуге және курортқа шығуға тыйым салынбайды. Алайда кейбір жерлерге көлікпен емес, басқа жолмен жетуге тура келеді.

Жаяу жүргіншілер үшін шатқалға және туристік нысандарға кіру мүмкіндігі сақталады.

Айта кетейік, осыған дейін «Медеу» спорт кешенінің автотұрағы жарты жылға жабылатынын жазған едік.