Қазақстанда алғаш рет халықаралық дрифт жарысы өтеді

Қазақстан алғаш рет Орталық Азия бойынша FIA дрифт кубогын қабылдайды. Kursiv Auto мәліметінше, халықаралық жарыс 25–27 қыркүйек аралығында Алматы маңындағы «Сокол» спорттық-туристік кешенінде өтеді.

Өңірдегі алғашқы FIA дрифт кубогы

FIA Central Asia Drifting Cup жарысының спорттық регламентін Дүниежүзілік автоспорт кеңесі бекітті. Бұл – Халықаралық автомобиль федерациясының (FIA) қолдауымен өтетін Орталық Азиядағы алғашқы ресми өңірлік дрифт кубогы.

«Сокол спорттық-туристік кешені үшін осындай ауқымды жарысты қабылдау – үлкен мәртебе. Біз бұл жауапкершілікті толық сезінеміз және турнирді жоғары деңгейде ұйымдастырып, жарысқа қатысушыларға, командалар мен көрермендерге барынша қолайлы жағдай жасау үшін барлық қажетті шараларды қабылдаймыз», – деді кешен директоры Рахымжан Тәліпов.

Қатысушыларды тіркеу басталды

Жарысқа қатысатын пилоттардан өтінім қабылдау басталып кетті. Тіркеу 1 қыркүйекке дейін жалғасады. Ұйымдастырушылар қатысушылар санына шектеу қоймаған.

Жарыс қалай өтеді

Турнир бағдарламасына жаттығу кезеңі, іріктеу жарыстары және жұптық жарыстар кіреді.

Іріктеу кезеңінде төрешілер пилоттардың траекторияны сақтауын, дрифт бұрышын, жылдамдығын және жүргізу мәнерін бағалайды. Осыдан кейін үздік қатысушылар жұптық кезеңге жолдама алады. Бұл кезеңде әр пилот кезекпен көшбасшы және қуып жетуші рөлінде өнер көрсетеді.

Жарыс қорытындысы бойынша жеке және командалық есепте жеңімпаздар анықталады.

Ұйымдастырушылар жарыстың нақты кестесін, билет бағасын және қатысушылар тізімін кейінірек жариялайтынын мәлімдеді.