Бұрынғы сенатор қайтадан аудан әкімі қызметін атқарады

Экс-сенатор Ернұр Әйткенов Павлодар облысы Ақтоғай ауданының әкімі лауазымына тағайындалды. Шенеунік парламентке келгенге дейін де төрт түрлі ауданды басқарған.

Павлодар облысының әкімі Асайын Байханов бейсенбі күні Ақтоғай ауданының активіне жаңа әкімді таныстырды, деп хабарлайды өңір әкімдігі. 61 жастағы Әйткенов бұған дейін осы өңірдегі Май, Баянауыл, Аққулы және Тереңкөл аудандарын басқарған. Мемлекеттік қызметте жүргеніне 20 жыл болған шенеунік осы өңірде туған.

Әйткенов 2023-2026 жылдар аралығында сенатор болған.

Байханов ауданның жаңа әкіміне инвестиция тартуды тапсырды. Өйткені Ақтоғай қазір шетелден қаражат тарту жағынан оныншы орында тұр.

Енді экс-сенатор мал азығын дайындау, егін жинау, автовокзал мен қоғамдық моншаны жөндеу, көпір салу және басқа да кезек күттірмейтін шаруалармен айналысады. Облыс басшысы Әйткеновке осындай тапсырмалар берген.

Ернұр Әйткенов «Құрмет» ордені мен «Ерен еңбегі үшін» медаліне ие. Ол Май және Баянауыл аудандарының құрметті азаматы.