Оңтүстікте аптап ыстық: 31 шілдеге ауа райы болжамы қандай
Шілденің соңғы күнi ел аумағында ауа райы құбылмалы, әр аймақта әртүрлi болады. Елдің басым бөлігінде аптап ыстық күшейе түскенімен, кей өңірлерде өткінші жаңбыр жауып, найзағай ойнайды.
Оңтүстік, оңтүстік-шығыс және орталық аймақтарға Иран аудандарынан келетін құрғақ әрі ыстық ауа массалары ықпал етеді. Осының салдарынан бұл өңірлерде жауын-шашын күтілмейді, температура жоғарылай береді
Оңтүстік өңірлерде (Түркістан, Қызылорда, Жамбыл облыстары) күндіз термометр бағаны 33-44 градусқа дейін көтеріледі. Қызылорда, Түркістан облыстарының кей жерлерінде шаңды дауыл тұруы мүмкін.
Орталық пен шығыста (Қарағанды, Ұлытау, Абай, Павлодар) күн ашық болып, термометр 31-41 градус аралығында аптап ыстықты көрсетеді.
Батыс пен оңтүстік-шығыста (Алматы, Жетісу, Атырау) жауын-шашынсыз, күндізгі температура 28-38 градус төңірегінде сақталады. Атырауда түс ауа шаңды дауыл соғуы ықтимал.
Жаңбыр, бұршақ және дауыл
Атмосфералық фронттардың өтуіне байланысты еліміздің батыс, солтүстік-батыс, солтүстік және шығыс аймақтарында ауа райы жауын-шашынды болады.
Солтүстік пен солтүстік-батыс өңірлерде (Қостанай, Солтүстік Қазақстан, Ақтөбе, Батыс Қазақстан) өткінші жаңбыр жауып, найзағай ойнайды. Кей жерлерде нөсер жауын жауып, бұршақ жаууы, дауыл туындауы мүмкін.
Ауа температурасы түнде 15-25 градус, күндіз 25-39 градус аралығында құбылады. (Ақмола облысында жауын-шашынсыз, күндіз 34-39 градус ыстық болады).
Шығыс Қазақстан мен Маңғыстау облыстарында да кей жерлерде жаңбыр жауып, найзағай ойнауы мүмкін.
Ірі қалалардағы ауа райы қандай
Астана: Күн құбылмалы бұлтты, жауын-шашынсыз болады. Оңтүстік-шығыстан соғатын желдің жылдамдығы секундына 1-12 метрге жетеді. Ауа температурасы түнде 19-21 градус, күндіз 35-37 градус аптап ыстық.
Алматы: Күн бұлтты, жауын-шашын күтілмейді. Жел 3-8 м/с жылдамдықпен соғады. Температура түнде 19-21 градус, күндіз 32-34 градус жылы.
Шымкент: Өткінші бұлтты, жауын-шашынсыз. Солтүстік-шығыстан соғатын желдің екпіні 15-20 м/с-қа дейін күшейеді. Ауа температурасы түнде 22-24 градус, күндіз 39-41 градус қатты ыстық болады.
Бұған дейін Астана қаласы Төтенше жағдайлар департаменті қатты ыстыққа қатысты ескерту жасаған.
