Дональд Трамп Иранмен келіссөздер басталғанын мәлімдеді

АҚШ Президенті Дональд Трамп Иранға қарсы «ауқымды» соққыларды тоқтатқаннан кейін, Тегеранмен жаңа келіссөздер дүйсенбіде басталатынын мәлімдеді. Алайда Иран тарапы келіссөздердің өтетін күнін де, оған дайын екенін де әлі ресми түрде растаған жоқ.

Трамптың мәлімдемелері

Президенттік Air Force One бортында журналистермен тілдескен Дональд Трамп Иран тарапы шабуылдың ауқымын білгенін жеткізді:

«Олар дайындалып жатқан соққының ауқымын білді, өйткені бәрін өз көздерімен көрді. Біз қазір олармен келіссөз жүргізіп жатырмыз. Кездесу ертең түстен кейін басталады», – деді АҚШ басшысы.

Бұған дейін Трамп Truth әлеуметтік желісінде Иран мен АҚШ-тың Таяу Шығыстағы одақтастары негізгі шарттар келісілгендіктен, кез келген әскери шабуылдан «бас тартуды» өтінгенін жазған болатын.

АҚШ Президенті Тегеранмен келісім жасасудың нақты мерзімін атаудан бас тартты:

«Оқиғалардың қалай өрбитінін көреміз. Біз кез келген уақытта әрекет етуге дайынбыз. Мен адамдардың өмірін қиғым келмейді», – деп қосты ол.

Трамптың айтуынша, соққыны кейінге қалдыруды Сауд Арабиясының тақ мұрагері ханзада Мухаммед бен Салман, сондай-ақ БАӘ мен Қатар сияқты АҚШ-тың негізгі серіктестері сұраған. Олар келісімнің негізгі шарттары дайын деп есептейді. Трамп Ормұз бұғазы бойынша келісім жасалып қойғанын және ядролық бағдарлама бойынша да келісімге қол жеткізілетінін атап өтті.

Сонымен қатар, Тегеран Трамптың келіссөздер туралы мәлімдемесіне ресми жауап берген жоқ. Президент Трамп та дүйсенбідегі кездесудің қай жерде өтетінін және оған кімдердің қатысатынын нақтылаған жоқ.

Трамптың келіссөздер туралы мәлімдемесінен кейін Азия сауда-саттығында әлемдік мұнай бағасы бірден төмендеді. Brent маркалы мұнай бағасы 5%-ға арзандап, барреліне 83,98 АҚШ долларын құрады.