«Қайрат» – «Левски» матчына билеттер сатылымға шықты

Алматылық «Қайрат» футбол клубы УЕФА Чемпиондар лигасының үшінші іріктеу кезеңі аясында болгариялық «Левски» командасына қарсы шешуші қарымта матчын өткізеді. 

Маңызды кездесу 11 тамыз күні сағат 20:00-де «Түркістан Арена» стадионында өтеді. Билеттерді Qairat SuperApp және Freedom SuperApp мобильді қосымшалары арқылы сатып алуға болады. Орындардың орналасуына байланысты билет бағасы 1 500 теңгеден 5 000 теңгеге дейін белгіленген. Сатып алу барысында ЖСН көрсету міндетті, сондай-ақ сатып алынған билеттер кері қайтарылмайтынын ескерген жөн.

Ұйымдастырушылар жанкүйерлерге билеттерді алыпсатарлардан алмауды қатаң ескертеді. Мұндай билеттердің күші жойылып, матчқа кіре алмай қалу қаупі бар, бұл өз кезегінде жанкүйерлерге де, ұйымдастырушыларға да қолайсыздық тудырады.

Алғашқы ойында «Қайрат» Болгарияда «Левскиге» 1-0 есебімен жеңілген еді.