Forbes тізіміндегі миллиардерге тиесілі фабрика өртенді

Абай облысы аумағындағы Ақтоғай кен орнында мыс байыту фабрикаларының бірі өртенді. Кәсіпорыннан 20 адам эвакуацияланды. Кен орны миллиардер Владимир Кимнің Kaz Mineral компаниясына тиесілі.

Оқыс оқиға 9 тамызда түскі сағат 12:00-де болған. Өрт Ақтоғайдағы № 1 кен байыту фабрикасынан шыққан. Бұл уақытта кәсіпорында мердігер ұйымның қызметкерлері жоспарлы жөндеу жұмыстарын жүргізіп жүрген.

«Өртті Ақтоғай ӘВҚҚ (Әскерилендірілген авариялық-құтқару қызметі) қызметкерлері сөндірді. Бықсу мен түтіндеу болған жоқ. Көршілес ғимараттарға, конвейерлерге және басқа да өндірістік учаскелерге де қауіп төнбеді. Экологияға зиян тимеді», – деп мәлімдеді Kaz Minerals.

Компания оқыс оқиғадан ешкім зардап шекпегенін, жұмысшылар дәрігерлер көмегіне жүгінбегенін ескертті.

Оттың тұтану себебі тексеріліп жатыр.

Ақтоғай кәсіпорны Kaz Minerals-қа тиесілі ең ірі өндіріс орны. 2024 жылы мұнда 229 мың тонна мыс өндірілген. Мұнда үш фабрика бар.

Kaz Minerals акцияларының 63,5%-на Владимир Ким, ал 36,5%-на Олег Новчук иелік етеді. Мажоритарлық акционердің дәулетін Forbes 5,9 млрд долларға бағалаған.

Тақырыпқа орай: Батыста жолаушы автобусы өртенді: салонда 37 адам болған