BYD Seal 06-ға бәсекелес Qin Max моделін шығарды
BYD бір-біріне өте ұқсас екі көлікті қатар нарыққа шығарды. Жаңа Qin Max моделі техникалық сипаттамалары, өлшемдері және қозғалтқыштары жағынан жақында жаңартылған Seal 06-ға барынша жақын. Алайда екі көлік Dynasty және Ocean атты бөлек сериялармен сатылады. Бұл туралы CarNewsChina-ға сілтеме жасап, Kursiv.Media хабарлайды.
Qin Max Қытайда DM-i гибридті жүйесі бар және толық электрлі нұсқаларымен, барлығы тоғыз түрлі жиынтықта ұсынылды. Бағасы 100–144 мың юань, яғни шамамен 7,2-10,4 млн теңге аралығында.
Ал 2026 жылғы BYD Seal 06 нарыққа екі күн бұрын ғана шыққан және оның бағасы да шамамен осы шамалас. Осылайша, BYD-дің екі моделі бір аудитория үшін өзара бәсекеге түспек.
Qin Max пен Seal 06 бір-біріне өте ұқсас
BYD Qin Max пен Seal 06 бір техникалық базаға негізделген. Екі седанның негізгі сипаттамалары да бірдей:
- доңғалақ базасы – 2820 мм;
- ұзындығы небәрі 4 мм, ал ені 10 мм айырмашылық жасайды;
- DM-i гибридті және EV электрлі нұсқалары бар;
- электр қозғалтқыштарының қуаты – 120 және 240 кВт;
- EV нұсқаларының жүріс қоры – CLTC стандарты бойынша 530 және 630 км;
- электрлі нұсқаларға екінші буындағы Blade аккумуляторы орнатылған;
- жылдам қуаттау жүйесі бар;
- DiSus-C, DiLink 150, AR-HUD жүйелері және кіріктірілген тоңазытқыш қарастырылған.
Осылайша, BYD өз модель қатарында техникалық жағынан бір-біріне өте жақын екі көлікті қатар ұсынып отыр. Сондықтан сатып алушы негізінен көліктің сыртқы дизайнына, салонның безендірілуіне және нақты жинақтамадағы жабдықтарға қарап таңдау жасайды.
Тағы да оқыңыз: BYD тоғыз минутта қуатталатын жаңартылған Leopard 3-ті таныстырды
