Нұрлы жол вокзалында заңсыз көші-қон арнасының жолы кесілді

Астанадағы «Нұрлы жол» теміржол вокзалы аумағында жұмыс істеген заңсыз көші-қон арнасының жолын Көліктегі полиция департаментінің қызметкерлері ҰҚК Шекара қызметімен бірлесіп, Бас көлік прокуратурасының үйлестіруімен кесті, деп хабарлайды Kursiv.Media.

Заңсыз схемаға көші-қон қызметінің лауазымды тұлғасы, Шетел азаматтарына қызмет көрсету орталығының қызметкерлері және делдалдар тартылған.

Іске қатысушылар шетел азаматтарына ақша үшін уақытша тұруға және жұмыс істеуге рұқсат алу үшін қажетті құжаттарды рәсімдеуді қамтамасыз еткен.

Делдалдарға электронды кезекті сақтамай, мемлекеттік қызметтерге басымдықпен қол жеткізу мүмкіндігі берілген.

«Құжаттарды кедергісіз рәсімдеу үшін көші-қон қызметі қызметкерінің қызметтік мүмкіндіктері пайдаланылған. Ол үшін жүйелі түрде ақша қаражаты, оның ішінде оның жақын туыстарының банк шоттарына аударылған. Осылайша, тегін мемлекеттік қызмет шын мәнінде шетел азаматтарын заңдастырудың заңсыз коммерциялық тетігіне айналдырылған», – деп хабарлады Көліктегі полиция департаменті.

Тергеу қорытындысы бойынша қылмыстық іс сотқа жолданды.

Астана қаласының қылмыстық істер жөніндегі ауданаралық соты көші-қон қызметінің бір қызметкеріне, «Азаматтарға арналған үкімет» мемлекеттік корпорациясының төрт қызметкеріне және бес делдалға қатысты үкім шығарды. Жекелеген тұлғаларға 3 жылдан 7 жылға дейін бас бостандығынан айыру жазасы тағайындалды. Бірнеше фигурант бас бостандығын шектеу және айыппұл түріндегі жазамен құтылды.