Астанада тегін үйірме мен спорт секциясына қалай жазылуға болады

Астанада балаға тегін үйірме мен спорт секциясын қайдан табуға болады / Фото: kursiv.media, Асқар Ахметуллин

Жаңа оқу жылы қарсаңында Астанада балаларды тегін спорт мектептері мен секцияларына қабылдау басталды. Балалар мен жасөспірімдер қаладағы мемлекеттік спорт мектептерінде түрлі спорт түрлерімен тегін айналыса алады. Осы орайда ата-аналарға қандай бағыттар қолжетімді, баланы секцияға қалай жазуға болады және қандай құжаттар қажет екенін түсіндіреміз.

Қазіргі уақытта Астанада балалар мен жасөспірімдерге арналған спорт мектептерінде 62 спорт түрі бойынша тегін жаттығуға мүмкіндік бар. Қалада қазір 10 спорт мектебі жұмыс істейді, онда шамамен 8 мың бала мен жасөспірім тегін білім алады.

Қандай спорт түрлері бар

Астана спорт мектептерінде гимнастика, футбол, хоккей, жүзу, күрес түрлері, бокс, дзюдо, таэквондо, жеңіл атлетика, баскетбол, волейбол және басқа да көптеген спорт түрлері бар. Биыл балаларға көркем және спорттық гимнастика, батутта секіру, спорттық альпинизм, биатлон, шаңғы жарысы, конькимен жүгіру, грек-рим және әйелдер күресі, академиялық есу, байдарка мен каноэда есу, суға секіру, садақ ату, стендтік ату, футбол, футзал және шайбалы хоккей сияқты бағыттар ұсынылады.

Мысалы, №1 спорт мектебінде көркем гимнастика, спорттық гимнастика, спорттық акробатика және батут гимнастикасы бар. №3 мектепте бокс, дзюдо, еркін және грек-рим күресі, ауыр атлетика бойынша жаттығуға болады. Ал №8 спорт мектебі футбол мен әйелдер футболына маманданған.

Баланы тегін секцияға қалай жазуға болады

Баланы спорт секциясына электронды түрде де, спорт мектебіне тікелей жүгіну арқылы да қабылдауға болады.

Сондай-ақ Астанада баланы тегін спорт секциясына жазу үшін ата-ана QOSYMSHA.KZ цифрлық платформасы арқылы өтініш бере алады. Бұл жүйеде мемлекеттік тапсырыс аясындағы тегін спорт секциялары мен үйірмелерге орындар бөлінеді. Астана әкімдігінің мәліметінше, платформа арқылы өтініш беру, ваучер алу және секцияны таңдау процесі бір жүйеге біріктірілген.

Өтініш беру үшін ата-ана QOSYMSHA.KZ сайтына тіркеліп, өзінің және баласының ЖСН-ін енгізіп, деректердің дұрыстығын растауы қажет. Ваучер берілгеннен кейін ата-ана баласына қолайлы секцияны таңдай алады.

Сонымен қатар баланы мемлекеттік спорт мектебіне тікелей қабылдаудың да өз тәртібі бар. Астанада спорт мектептеріндегі тегін оқуға қабылдау бойынша өтініштер тиісті мемлекеттік қызмет арқылы беріледі. Биылғы қабылдау мен іріктеу тамыз-қыркүйек айларында өтуде.

Тегін секцияларға қабылдау балаларға қосымша білім беруге арналған мемлекеттік тапсырыс аясында жүзеге асырылады. 2025 жылғы 1 маусымнан бастап бұл бағытта балаларға арналған бірыңғай мемлекеттік тапсырысты орналастыру бойынша пилоттық жоба іске қосылған.

Қандай құжаттар керек

Спорт секциясына қабылдау үшін баланың заңды өкілі мына құжаттарды ұсынуы керек:

секцияға қабылдау туралы өтініш;
баланың фотосуреті;
баланың туу туралы куәлігінің көшірмесі;
медициналық ұйым беретін 027/у нысанындағы анықтама;
ата-ананың немесе заңды өкілдің жеке басын куәландыратын құжаттың көшірмесі.

Егер балада мүгедектік немесе ерекше білім беру қажеттілігі болса, оның тиісті мәртебесін растайтын құжат та қажет.

Астанадағы спорт мектептерінің тізімі

№1 мамандандырылған балалар мен жасөспірімдер олимпиадалық резерв спорт мектебі
Мекенжайы: Ә. Жангелдин көшесі, 9А.
Спорт түрлері: көркем және спорттық гимнастика, спорттық акробатика, батут гимнастикасы.

№2 мамандандырылған балалар мен жасөспірімдер спорт мектебі
Мекенжайы: Қабанбай батыр даңғылы, 47.
Спорт түрлері: мәнерлеп сырғанау, шаңғы жарысы, спорттық бағдарлау, конькимен жүгіру, шорт-трек.

№3 мамандандырылған балалар мен жасөспірімдер олимпиадалық резерв спорт мектебі
Мекенжайы: Жирентаев көшесі, 2Б.
Спорт түрлері: бокс, әйелдер боксы, еркін күрес, әйелдер күресі, грек-рим күресі, дзюдо, ауыр атлетика.

№4 мамандандырылған балалар мен жасөспірімдер олимпиадалық резерв спорт мектебі
Мекенжайы: Тәуелсіздік даңғылы, 2, «Толқын» спорт кешені.
Спорт түрлері: жүзу, суға секіру, академиялық есу, байдарка және каноэда есу.

№5 мамандандырылған балалар мен жасөспірімдер олимпиадалық резерв спорт мектебі
Мекенжайы: Қорғалжын тасжолы, 13Б.
Спорт түрлері: гандбол, волейбол, баскетбол, регби.

№6 мамандандырылған балалар мен жасөспірімдер олимпиадалық резерв спорт мектебі
Мекенжайы: Қабанбай батыр даңғылы, 45А.
Спорт түрі: велоспорт.

№7 мамандандырылған балалар мен жасөспірімдер спорт мектебі
Мекенжайы: Пригородный тұрғын алабы, Е-620 көшесі, 18-ғимарат.
Спорт түрлері: таэквондо, каратэ-до, самбо, қазақ күресі, джиу-джитсу, муай-тай, киокушинкай каратэ, кикбоксинг, грэпплинг және басқа жекпе-жек түрлері.

№8 мамандандырылған балалар мен жасөспірімдер олимпиадалық резерв спорт мектебі
Мекенжайы: Кенесары көшесі, 14.
Спорт түрлері: футбол, әйелдер футболы.

№9 балалар мен жасөспірімдер спорт мектебі
Мекенжайы: Абай даңғылы, 59/1.
Спорт түрлері: жеңіл атлетика, оқпен ату, стендтік ату, садақ ату, семсерлесу, қазіргі бессайыс, триатлон, үстел теннисі, бадминтон.

№10 шайбалы хоккей бойынша мамандандырылған балалар мен жасөспірімдер спорт мектебі
Мекенжайы: Қажымұқан көшесі, 7/1, «Барыс» спорт кешені.
Спорт түрлері: шайбалы хоккей және допты хоккей.

Бұдан бөлек, Астанада мүмкіндігі шектеулі спортшыларға арналған балалар мен жасөспірімдер спорт мектебі де жұмыс істейді. Онда шахмат, дойбы, тоғызқұмалақ, паратаэквондо, парадзюдо, жүзу, жеңіл атлетика, пауэрлифтинг және басқа да спорт түрлері бар.

Оқушылар сарайлары мен қосымша білім беру орталықтары

Астанада спортпен ғана шектелмей, шығармашылық, техникалық, ғылыми және басқа бағыттар бойынша тегін үйірмелерге қатысуға болатын мемлекеттік қосымша білім беру ұйымдары да бар. Қалада мұндай 14 мемлекеттік ұйым жұмыс істейді.

Олардың ішінде:

Әл-Фараби атындағы Оқушылар сарайы – Бауыржан Момышұлы көшесі, 5. Мұнда балаларға шығармашылық, білім беру және спорт бағыттарындағы үйірмелер ұсынылады.
Махамбет Өтемісұлы атындағы Оқушылар сарайы – Ә. Мәмбетов көшесі, 1. Мұнда да балалардың шығармашылық қабілетін дамытуға арналған қосымша білім беру бағыттары бар.
«TANYM» көпфункционалды кешені – Мұхамедханов және Ш.Айтматов көшелерінің қиылысында орналасқан мемлекеттік қосымша білім беру нысаны. Мұнда балалардың шығармашылық, зияткерлік және спорттық қабілеттерін дамытуға бағытталған жобалар жүзеге асырылады.
Техникалық шығармашылық орталығы – Сарыадыр көшесі, 3.
«Өркен» балалар мен жасөспірімдер дене тәрбиесі орталығы – Қаныш Рысқұлбеков көшесі, 4/4.
Балалар мен жасөспірімдердің туризм және өлкетану орталығы – Тамшалы көшесі, 24.

Қабылдау қашан жүреді

Астанада спорт мектептеріндегі топтарды жасақтаудың негізгі кезеңі дәстүрлі түрде тамыз-қыркүйек айларына келеді. Сондықтан баласын тегін үйірмеге бергісі келетін ата-аналар осы кезеңде таңдаған спорт мектебіне жүгініп, бос орындар мен қабылдау шарттарын нақтылағаны жөн.

Яғни ата-анаға ең алдымен баласына лайық спорт түрін таңдап, қажетті құжаттарды дайындау керек. Одан кейін өтінішті онлайн беруге немесе тиісті спорт мектебіне жүгінуге болады.