Атыраудағы отбасының өлімі: Сәрсемалиевтің өмір бойына түрмеде қалу үкімі күшіне енді
Атырау облысының Жангелдин ауылында бұрынғы әйелінің төрт туысын өлтіргені үшін сотталған Сұлтан Сәрсемалиевке қатысты өмір бойына бас бостандығынан айыру үкімі заңды күшіне енді, деп хабарлайды Кursiv.Media басылымы «Ақ Жайыққа» сілтеме жасап.
Сотталған Сұлтан Сәрсемалиев пен оның адвокаты апелляциялық шағым түсірмеген. Процестің басқа қатысушылары да үкімге шағымданбады.
Айта кетейік, процесс аяқталғаннан кейін түскен жалғыз шағым банк өкілдерінен болды, бірақ ол Сәрсемалиевке кесілген үкімге емес, соттың қаржы мекемесінің атына шығарған жеке қаулысына қатысты.
Жақын арада Сәрсемалиев өмір бойы жазасын өтеу үшін қылмыстық-атқару жүйесі мекемесіне жіберілуге тиіс.
Сот Сұлтан Сәрсемалиевке өмір бойына бас бостандығынан айыру үкімін 14 шілдеде шығарған еді.
Төрт адамның өлімі
Іс материалдарына сәйкес, Сәрсемалиев 2025 жылдың мамырында жалдап тұрған үйінде қайын ағасы Наурыз Мұқанғалиевті пышақтап өлтірген. Кейін мәйітін үйдің маңына көміп, жақындары күмәнданбас үшін оның атынан хабарламалар жазып отырған.
Сол жылдың қазанында Жангелдин ауылында тұратын бұрынғы қайын атасы мен енесін де өз үйінде пышақтаған. Жерді 1 метр 30 сантиметр етіп қазып, екі адамның мүрдесін сол жерге көмеді.
Осыдан кейін бұрынғы әйелі Ақбаян мен қайын апасы Мейрамгүл Қарабалинаны ертіп Атырауға барған. Қалада қайын апасы Мейрамгүлді де пышақтап өлтіріп, мәйітін Наурыздың жанына көмген.
