«Қайрат» өз алаңында «Тобылға» жол беріп, «Ордабасы» көш басына қайта шықты
Қазақстан Премьер-лигасының 26-туры аясында Алматыда өткен орталық матч күтпеген нәтижемен аяқталды. Алтын жүлдеге басты үміткерлердің бірі — алматылық «Қайрат» өз алаңында қостанайлық «Тобылды» қабылдап, 1:4 есебімен жеңіліске ұшырады.
Кездесу тартысты басталды. 18-минутта «Тобыл» сапынан Милованович пенальтиді дәл орындап, есеп ашты (0:1). 40-минутта «Қайраттың» шабуылшысы Марк Гуаль таразы басын теңестіріп, жанкүйерлерге үміт сыйлады (1:1).
Дегенмен, бірінші таймның аяқталуына сәл қалғанда, 44-минутта Милованович Лисаковичтің берген пасын мүлт жібермей, дубль авторы атанды (1:2).
Екінші таймда қостанайлықтар үстемдігін ары қарай жалғастырды: 63-минутта Асхат Тағыбергеннің пасынан кейін Лисакович есепті еселей түсті (1:3). 81-минутта Л. Герра матчтың соңғы нүктесін қойып, «Тобылға» сенімді жеңіс сыйлады (1:4).
Турнирлік кестедегі өзгерістер
Осы жеңілістен кейін «Қайрат» 25 ойыннан кейін 57 ұпаймен екінші орынға сырғыды. Ал «Ордабасы» 25 кездесуде 58 ұпай жинап, Премьер-лиганың турнирлік кестесінде бірінші орынға қайта көтерілді. 3-орында келе жатқан «Астананың» еншісінде 24 ойыннан кейін 45 ұпай бар.
КПЛ: «Қайрат» пен «Ордабасының» соңғы 5 ойыны
Премьер-лиганың аяқталуына небәрі 5 тур қалды. Екі басты үміткердің алдағы шешуші кездесулер кестесі төмендегідей:
«Қайраттың» КПЛ-дағы соңғы 5 ойыны:
- 17.09.2026 | «Астана» — «Қайрат»
- 10.10.2026 | «Қайрат» — «Жетісу»
- 18.10.2026 | «Қайрат» — «Ертіс»
- 25.10.2026 | «Ақтөбе» — «Қайрат»
- 31.10.2026 | «Қайрат» — «Altai»
«Қайрат» сонымен қатар қазан айында Конференция Лигасында «ФК Рига» және «Панатинаикос» клубтарымен де кездеседі.
«Ордабасының» КПЛ-дағы соңғы 5 ойыны:
- 17.09.2026 | «Атырау» —«Ордабасы»
- 11.10.2026 | «Қайсар» — «Ордабасы»
- 17.10.2026 | «Ақтөбе» — «Ордабасы»
- 24.10.2026 | «Ордабасы» — «Жеңіс»
- 31.10.2026 | «Ертіс Павлодар» – «Ордабасы»
