Бақытжан Базарбек сияқты әйеліме жұмысқа шық демедім

Құрылтай депутаты Айдос Сарым депутаттардың жалақысы еңбек өтілі мен қызметтегі жылдарына байланысты әртүрлі болатынын түсіндіріп өтті, деп хабарлайды Кursiv.Media.

Депутаттардың айлығы шамамен 600 мың теңгеден 1 миллион теңгеге дейін жетеді.

«Еңбек өтіліне, қызметтегі жылдарына байланысты жалақы мөлшері әртүрлі. Ғылыми дәрежеңіз бен атақтарыңыз да ескеріледі. Мысалы, бұрын генерал немесе елші болған болсаңыз, тиісті үстемақы қарастырылады», – деді Айдос Сарым.

Депутат өзінің жалақысы 1 миллион теңгеден сәл төмен екенін айтты.

«Менің жалақым миллион теңгеден сәл төмен, нақты сомасы есімде жоқ. Осында отырып жұмыс істеп жүргеніме қарағанда, әзірге жетіп жатыр», – деді депутат.

Сондай-ақ Айдос Сарым отбасындағы табысқа қатысты әзілдеп, Бақытжан Базарбек сияқты әзірге әйелін жұмысқа шығуға мәжбүрлемегенін айтты.

Экс-депутат Бақытжан Базарбек кезінде депутаттың жалақысы жетпеген соң, әйелінен жұмыс істеуді өтінгенін айтқан еді.