Жапония визасына өтініш беру тәртібі өзгереді
Жапонияның Қазақстандағы елшілігі визаға өтініш қабылдау тәртібін өзгертеді, деп хабарлайды Kursiv.media.
Дипломатиялық өкілдіктің мәліметінше, 23 қыркүйектен бастап елшілікке келген азаматтарға реттік нөмірі бар талондар беріле бастайды. Жаңа тәртіп келушілерге ыңғайлы болу және қабылдау терезелеріндегі кезекті реттеу үшін енгізіледі.
«Нөмірлі талондар құжаттарды қабылдау күні сағат 9:30-дан бастап елшіліктің күту залында беріледі. Талон алған азаматтар залда күтпей, сағат 12:00-ге дейін кез келген уақытта құжат қабылдау терезесіне қайта келе алады. Талон визаға өтініш беруге құқық береді. Алайда құжаттар кезек тәртібімен қабылданады», – делінген хабарламада.
Талон тек оны алған күні ғана жарамды болады. Ал дайын құжаттарды алу кезінде талон көрсету талап етілмейді.
Нөмірлі талонсыз өтініш беруге болатын жағдайлар:
- Жапония үкіметінің немесе мемлекеттік мекемелерінің шақыруы бойынша;
- медициналық қызмет алу мақсатында елде болу үшін;
- вербалды нота негізінде.
Жапония елшілігі Астанада орналасқан. Құжаттар жұмыс күндері сағат 9:30-дан 12:00-ге дейін, ал дайын құжаттарды беру 14:30-дан 17:00-ге дейін жүргізіледі.
Құжаттарға қатысты ескертулер болмаған жағдайда туристік виза бесінші жұмыс күні беріледі. Бір реттік қысқа мерзімді виза берілген күннен бастап үш ай бойы жарамды.
Виза рәсімдеуге қажетті құжаттар тізімімен елшіліктің ресми сайтынан танысуға болады.
Еске салайық, Жапония үкіметі шетелдік азаматтар үшін елге кіру визаларының құнын көтеру туралы шешім қабылдады. Министрлер кабинетінің жаңа қаулысына сәйкес, бір реттік визаның құны 3000-нан 15 000 иенге дейін өседі, ал көп реттік виза 6000-нан 30 000 иенге дейін қымбаттайды. Жаңа тарифтер 1 шілдеден бастап берілген өтініштерге қолданыла бастайды.
