Қазақстанда корей балмұздағы шығарылады

Қазақстанда корей үлгісіндегі балмұздақ түрлері шығарыла бастайды. Бұл туралы Ауыл шаруашылығы министрлігі хабарлады, деп жазады Kursiv.Media.

Бүгінде Ауыл шаруашылығы министрлігі, «Шин-Лайн» компаниясы және Оңтүстік Кореяның Sungwon Machinery Co., Ltd. компаниясы үшжақты өзара түсіністік туралы меморандумға қол қойды.

Меморандум озық азиялық технологияларды Қазақстанда енгізуге, өндірістік қуаттарды дамытуға және корей үлгісіндегі балмұздақ түрлерін шығаруды жолға қоюға бағытталған.

Балмұздақ шығаратын жаңа компания пайда болады

«Шин-Лайн» серіктестігі базасында «Шин-Лайн Инжиниринг» компаниясы құрылады. Жаңа компания заманауи өндірістік технологияларды енгізу, жетілдіру және қазақстандық өндіріс жағдайына бейімдеу бағытында жұмыс істейтін орталыққа айналмақ.

Ынтымақтастық аясында балмұздақ өндіруге арналған автоматтандырылған шешімдер енгізіледі. Атап айтқанда, құрғақ глазурьлеу (Dry Coater) технологиясы, жоғары дәлдікте жұмыс істейтін сорғы станциялары және Summer Crunch сериясындағы өндірістік кешендер қолданылады.

Ауыл шаруашылығы министрлігі өз тарапынан жобаға ақпараттық және консультациялық қолдау көрсетеді.

«Біздің мақсатымыз Қазақстанға корейлік тәжірибені әкеліп, өз инженерлік әлеуетімізді қалыптастыру және халықаралық жоғары стандарттарға сай келетін жаңа өнімдер шығару», – деді «Шин-Лайн» ЖШС президенті Андрей Шин.

Сонымен бірге Қазақстан Кореяның сутегі энергетикасын дамыту тәжірибесіне қызығушылық танытып отыр.