Алматыда «самокат патрулі» қайда кеткен: полиция жауап берді
Алматы көшелерінде шағын электр көліктерінің көбейгені соншалық, тұрғындар тарапынан жол қауіпсіздігіне қатысты шағымдар жиілеп кетті. Осыған байланысты қалада арнайы құрылған «самокат патрульдерінің» жұмысы бәсеңдеп қалды ма деген заңды сұрақ туындайды.
Kursiv.Media сауалына берілген Алматы қалалық Полиция департаментінің ресми жауабына сәйкес, арнайы «самокат патрульдері» мен жаяу және мото-патрульдер жойылған жоқ, керісінше өз жұмыстарын қарқынды түрде жалғастыруда.
«Самокат патрульдері» қай жерлерде жүреді
Тәртіп сақшылары тексеру жұмыстарын негізінен мынадай аймақтарда жүргізеді:
- Самокаттар мен мопедтер ағыны тығыз қозғалатын негізгі магистральдарда.
- Жиі шағым түсетін Панфилов, Жібек жолы (Арбат) сияқты көшелерде.
- Қалалық саябақтар, гүлзарлар мен скверлерде.
Бақылау қалай жүзеге асырылады?
Полиция қызметкерлері заңбұзушылық жасаған жүргізушілерді дереу тоқтатып, түсіндіру жұмыстарын жүргізеді және әкімшілік хаттама толтырады.
Одан бөлек, полиция қала әкімдігімен бірлесіп шерингтік (жалға берілетін) самокат компанияларының қызметін де тексеруде. Әсіресе саябақтар мен жаяу жүргіншілер аймағында жылдамдықты шектеу және бағдарламалық бұғаттау жүйелерінің жұмысы қатаң бақылауға алынған.
25 тамыздан бастап жүргізілген алғашқы күшейтілген аптаның өзінде Алматы полициясы жол ережесін бұзған электросамокат жүргізушілеріне қатысты 6 044 әкімшілік хаттама толтырған болатын. Ал талапқа сай келмейтін немесе ережені өрескел бұзған 2 489 электросамокат мамандандырылған айыптұрақтарға қойылды.
