Жүргізушісіз такси келесі жылы жүре бастайды

Қазақстанда жүргізушісіз такси келесі жылы іске қосылмақ. Бүгін үкімет отырысында осы мәселе талқыланды деп хабарлайды Kursiv Media.

Қазір Алматыда алғашқы жүргізушісіз көлік тест режимінде сынақтан өтіп жатыр. Көлік әзірге қала туралы мәлімет жинап, оның цифрлық картасын қалыптастыру үшін пайдаланылады дейді Yandex Qazaqstan бас директоры Тимур Шалекенов. Оның түсіндіруінше, автокөлік коммерциялық жолаушы тасымалына шығуы үшін алдымен тест режимінде бірнеше мың шақырым жол жүруі керек.

Ал жасанды интеллект министрі Жаслан Мәдиевтің сөзінше, қазір жүргізушісіз көліктерді пайдалануға мүмкіндік беретін қажетті заңнамалық база әзірленіп жатыр. Пилоттық жоба Алматы, Астана және Қосшы қалаларында іске қосылған.

Жүргізушісіз такси – жасанды интеллект пен арнайы сенсорлар арқылы жолдағы жағдайды бақылап, адамның көмегінсіз қозғала алатын көлік.

Биыл жазда елде жүргізушісіз көліктер мен роботакси іске қосуға ресми рұқсат берілген еді. Мұндай көліктерді жолаушылар мен багаж тасымалдауға да пайдалануға болады.