Халық Кеңесі мен Құрылтай бір-бірінің жұмысына араласа алмайды – Тоқаев
Кеңес мүшелерінің Құрылтайдың жұмысына, ал Құрылтай депутаттарының Халық Кеңесінің жұмысына араласуға хақы жоқ. Тәуелсіздік сарайында өтіп жатқан жаңа институттың алғашқы сессиясында президент Қасым-Жомарт Тоқаев осылай деп мәлімдеді.
«Құрылтайға балама мекеме емес»
Тоқаевтың айтуынша, Халық кеңесі Құрылтайдың құзыретіне кіретін жұмыстармен айналыспайды. Сондай-ақ Кеңес мүшелері Құрылтай депутаттарының қызметіне араласа алмайды.
«Халық кеңесі – Құрылтайға балама мекеме емес. Кеңес мүшелері Құрылтайдың құзыретіне кіретін жұмыспен айналыспайды. Депутаттардың қызметіне араласпайды», – деді президент.
Мемлекет басшысы бұл талап екі жаққа да ортақ екенін атап өтті. Яғни Құрылтай депутаттары да Халық кеңесінің жұмысына араласпауы керек.
«Тиісінше, Құрылтай депутаттарының да Халық кеңесінің жұмысына араласуға хақы жоқ», – деді ол.
Екі институт бір-бірін толықтыруы керек
Тоқаевтың сөзінше, Халық кеңесі мен Құрылтайдың басты міндеті – бір-біріне кедергі келтіру емес, керісінше, өзара толықтыру.
Президент осы мақсатта Халық кеңесі мен Құрылтай комитеттерінің тығыз байланыста әрі үйлесімді жұмыс істеуі маңызды екенін айтты.
«Екі институт та бір-бірін толықтырып, бірлесе қызмет етуі керек», – деді Қасым-Жомарт Тоқаев.
Оның айтуынша, заң жобаларын әзірлеу кезінде қоғамның пікірі мен талап-тілегін толық ескеру қажет. Осы ретте Құрылтай мен Халық кеңесінің бірлесіп жұмыс істеуі маңызды мүмкіндік береді.
Халық кеңесіне кімдер кірді
Президент Халық кеңесінің құрамына этномәдени бірлестіктердің, аймақтық мәслихаттар мен қоғамдық кеңестердің, сондай-ақ қоғамдық ұйымдардың өкілдері кіргенін атап өтті.
«Заң жобаларын әзірлеу барысында жұртшылықтың ой-пікірін, талап-тілегін толыққанды ескеру қажет. Құрылтай мен Халық кеңесі әрқашанда бірге болса, осындай мүмкіндік міндетті түрде пайда болады», – деді президент.
Халық Кеңесі Қазақстандағы жоғары конституциялық консультативтік орган ретінде құрылған. Оның құрамына 126 адам кірді.
