Абай облысының тұрғыны көлік тұрағы үшін салынған айыппұлды төлемейтін болды

Абай облысының тұрғыны көлікті дұрыс қоймағаны үшін салынған айыппұлды сот арқылы жойды, деп хабарлайды Kursiv.Media.

Облыстық соттың баспасөз қызметі хабарлауынша, жүргізуші патрульдік полицияның қаулысына шағымданған. Полицейлер оны Әкімшілік құқық бұзушылық туралы кодекстің 597-бабы – көлік құралдарын тоқтату немесе тұраққа қою ережелерін бұзу бойынша жауапкершілікке тартқан.

Алайда ер адам подъезд маңына көлік қойғаны үшін айыппұл салынуы негізсіз деп есептеген.

Сот отырысында көліктің тұрақ ережесін бұзғанын растайтын тиісті дәлелдер ұсынылмағаны анықталды.

«Заңда белгіленген тәртіппен жиналған дәлелдер болмаса, полиция қызметкерлерінің болжамы әкімшілік құқық бұзушылық жасалғаны туралы шешімге негіз бола алмайды», – делінген сот хабарламасында.

Сот кінәсіздік презумпциясы қағидатына сүйеніп, әкімшілік құқық бұзушылық туралы істі тоқтатты.

Айта кетейік, автотұрақты тегін пайдалана алатын адамдар тізімін мына жерден көруге болады.