Егін жинау науқаны аяқталуға жақын: 19,9 млн тонна астық жиналды
Қазақстанда биыл бірқатар өңірде құрғақшылық байқалғанымен, астық түсімі көпжылдық орташа көрсеткіштен жоғары болуы мүмкін. Қазірдің өзінде елде 19,9 млн тонна астық жиналды, ал майлы дақылдардан 5 млн тоннадан астам рекордтық өнім күтіліп отыр. Бұл туралы Ауыл шаруашылығы вице-министрі Азат Сұлтанов мәлімдеді, деп хабарлайды Kursiv.Media.
13,5 млн гектар астық жиналды
Қазіргі уақытта республика бойынша 13,5 млн гектар дәнді дақыл, яғни жалпы алқаптың 83%-ы жиналған. Орташа өнімділік гектарына 14,7 центнерді құрады.
Вице-министрдің айтуынша, солтүстік және орталықтың жекелеген өңірлерінде жауын-шашын аз болған. Соған қарамастан шаруалар қажетті агротехникалық жұмыстарды уақытында жүргізе алған.
«Үкімет тарапынан қабылданған шаралардың, оның ішінде жеңілдетілген қаржыландырудың арқасында шаруалар қажетті агротехникалық іс-шараларды уақтылы әрі сапалы жүргізе алды», – деді Азат Сұлтанов.
Майлы дақылдардан рекорд күтіледі
Соңғы жылдары егіс алқаптарының құрылымы өзгеріп келеді. Майлы дақылдардың көлемі 2024 жылдан бері 2,9 млн гектардан 5,2 млн гектарға дейін ұлғайған.
Қазірдің өзінде 2,4 млн гектардан 2,4 млн тонна майлы дақыл жиналды. Науқан толық аяқталғаннан кейін оның көлемі 5 млн тоннадан асуы мүмкін.
Ал дәнді дақылдардың егістегі үлесі 72%-дан 66%-ға төмендеген. Майлы дақылдардың үлесі керісінше 13%-дан 18%-ға өскен.
Егін жинау аяқталуға жақын
Бірқатар облыста егін жинау жұмыстары аяқталған. Батыс Қазақстан облысында науқан толық біткен, ал Шығыс Қазақстан, Павлодар, Жамбыл және Қарағанды облыстарында 95%-дан астам алқап жиналған.
Сонымен қатар биыл 2,9 млн тонна көкөніс, 2,3 млн тонна бақша дақылы және 2,5 млн тонна картоп жиналған.
Министрлік жиналатын астық көлемі елдің азық-түлік, мал азығы және тұқымға деген қажеттілігін толық қамтамасыз етуге мүмкіндік береді деп отыр.
Еске салайық, шаруаларға арналған «Кең дала 2» бағдарламасына өтінімдер 1 қазанда басталады. Ауыл шаруашылығы тауарын өндірушілер алған қаражатты жаңа маусымға дайындыққа, соның ішінде қажетті ресурстарды сатып алуға, техниканы жөндеуге және негізгі шығындарды жоспарлауға пайдалана алады.
