Президент Германия канцлері Фридрих Мерцпен келіссөз жүргізді

Қазақстан президенті Қасым-Жомарт Тоқаев Германия канцлері Фридрих Мерцпен келіссөз өткізді. Тараптар екіжақты стратегиялық серіктестікті нығайту және экономикалық байланыстарды кеңейту мәселелерін талқылады, деп хабарлайды Кursiv.Media.

Кездесуде өнеркәсіп, аса маңызды минералдар, көлік және логистика, цифрлық технологиялар, машина жасау және химия өнеркәсібі салаларындағы ынтымақтастықты дамытуға басымдық берілді. Сонымен қатар, тараптар «Орталық Азия – Германия» форматы аясындағы көпжақты байланыстарды жалғастыруға уағдаласты.

Кеңейтілген құрамдағы келіссөзде Қасым-Жомарт Тоқаев Германия Қазақстанның негізгі сауда серіктестері мен жетекші инвесторларының бірі екенін атап өтті.

«Өзара сауда-саттық көлемі өткен жылы 13,4 пайызға ұлғайып, 4,5 миллиард долларға жетті. Германияның соңғы 21 жылда елімізге салған инвестициясы 8 миллиард долларды межеледі. Осы ретте германиялық инвестицияның қауіпсіздігін қамтамасыз ету айрықша бақылауда екенін айтқым келеді», – деді Қасым-Жомарт Тоқаев.

Қазіргі таңда Қазақстан мен Германияның бірлескен инвестициялық портфелінде жалпы құны шамамен $54 млрд болатын 40 өнеркәсіптік жоба бар.

Мемлекет басшысы сондай-ақ білім, ғылым және мәдениет салаларындағы байланыстарды кеңейту қажеттігін айтты. Келіссөз соңында Тоқаев Фридрих Мерцті Қазақстанға мемлекеттік сапармен келуге шақырды.

«Қазақстан мен Германия арасындағы стратегиялық серіктестік берік саяси диалогқа, ортақ экономикалық мүддеге және халықтар арасындағы тығыз байланысқа негізделеді», – деді президент.

Айта кетейік, осыған дейін Қазақстан президенті Қасым-Жомарт Тоқаев пен Германия президенті Франк-Вальтер Штайнмайер келіссөз жүргізген еді.