Әлемге әйгілі колумбиялық әнші Шакира 18 қазанда Бішкекте концерт өткізеді. Концерт билеттері 1 қазанда сатылымға шығады, деп хабарлайды Kursiv.Media.
Шакира Қырғызстан астанасындағы Bishkek Arena стадионында өнер көрсетеді. Бұл оның Орталық Азиядағы алғашқы концерті болмақ. Шоу әншінің Las Mujeres Ya No Lloran World Tour әлемдік туры аясында өтеді.
Билетті қайдан алуға болады?
Билеттерді сату 1 қазанда Бішкек уақытымен сағат 09:00-де басталады. Қазақстан мен Қырғызстан арасында бір сағат айырмашылық бар. Сондықтан қазақстандық жанкүйерлер үшін сатылым 1 қазанда сағат 08:00-де ашылады. Билеттер GovTicket платформасында сатылады.
Билеттердің негізгі санаттары 12 мыңнан 40 мың қырғыз сомына (60 000 – 200 000 теңге) дейін болады. Ең арзан 12 мың сомдық орындардың сахнаға көрінісі шектеулі. Отыратын орындар 13,5 мыңнан 40 мың сомға дейін, Ground Admission – 27 мың сом, Skybox – бір адамға 30 мың сом, ал сахна алдындағы фан-аймақтар – 40 мың сом.
VIP санатындағы билеттер негізгі сатылымнан бөлек, кейінірек шектеулі мөлшерде шығарылады. Олардың нақты бағасы әзірге жарияланған жоқ.
Оқи отырыңыз: Шакира Қазақстанға келуі мүмкін бе
