Астанада зейнеткерлерге қарттар күніне орай біржолғы ақшалай көмек беріледі

Астанада Қарттар күніне орай 110 мыңнан астам зейнеткер біржолғы әлеуметтік төлем алады. Бұл туралы Астана әкімдігі «Курсивке» берген жауабында мәлімдеді.

Кімдерге төленеді

Төлем Астанада тіркелген жасы бойынша зейнеткерлерге, сондай-ақ зейнеткерлік жастағы және ең төмен мөлшердегі зейнетақы алатын азаматтарға қарастырылған.

2026 жылы бір АЕК 4 325 теңге болғандықтан, 2,5 АЕК мөлшері 10 812,5 теңгеге тең.

Әкімдік мәліметінше, әлеуметтік көмек алатын азаматтардың тізімін «Азаматтарға арналған үкімет» мемлекеттік корпорациясы ұсынады.

«1 қазан – Қарттар күніне орай Астана қаласында тіркелген жасы бойынша зейнеткерлерге және ең төмен мөлшердегі зейнетақы алушылар ішінен зейнеткерлік жастағы адамдарға 2,5 айлық есептік көрсеткіш көлемінде ақшалай төлем жүргізіледі», – деп хабарлады қала әкімдігі.

Өтініш берудің қажеті жоқ

Ақшаны алу үшін арнайы өтініш жазу талап етілмейді. Төлем мемлекеттік корпорация ұсынған тізім негізінде автоматты түрде жүргізіледі. Жалпы бұл көмекпен 110 мыңнан астам зейнеткер қамтылады.

Айта кетейік, 1 қазан – Халықаралық қарттар күні. Бұл күнді БҰҰ Бас Ассамблеясы 1990 жылғы 14 желтоқсандағы №45/106 қарарымен белгілеген.

Тағы да оқыңыз: Қазақстандықтар қартайған шағында немен айналысады