Lexus LX жаңартылды: жаңа F SPORT жинақтамасы ұсынылды
Lexus компаниясы флагмандық LX жол талғамайтын көлігіне бірқатар жаңарту енгізді, деп хабарлайды Kursiv.media.
Toyota ақпаратына қарағанда, модель қатарына жаңа F SPORT жинақтамасын қосты. Жаңартылған LX 1 қазаннан бастап Жапониядағы Lexus дилерлік орталықтарында ұсыныла бастаған.
LX – Lexus-тің флагмандық SUV моделі. Ол жоғары жүріс сапасы мен брендке тән жайлылықты үйлестіреді. Әлемнің 50-ден астам елінде танымал.
Жаңарту барысында барлық жинақтамалардағы электрлік руль күшейткішінің (EPS) баптауы жетілдіріліп, руль басқаруын жүргізушінің әрекетіне барынша дәл сәйкестендіру көзделген. Сондай-ақ аспа жүйесі қайта бапталып, көліктің тұрақтылығы мен жүріс жайлылығы арттырылды.
Жаңа LX F SPORT
Жаңа F SPORT нұсқасы спорттық дизайн мен динамикалық жүргізу сезімін күшейтуге бағытталған.
Стандартты жабдық құрамына арнайы бапталған алдыңғы және артқы Performance Dampers амортизаторлары, Torsen жоғары үйкелісті дифференциалы, артқы тұрақтандырғыш, F SPORT-қа арнайы бапталған EPS және AVS жүйелері кіреді.
Бұл шешімдер рульдің реакциясын жақсартып, жоғары жылдамдықта басқару тұрақтылығын арттырады.
Спорттық сыртқы дизайн
F SPORT нұсқасы қара түсті торлы радиатор торымен, хром элементтерімен және төмендетілген алдыңғы бөлігімен ерекшеленеді. Артқы бампер диффузор стилінде орындалып, қара түске боялған.
Көлік 22 дюймдік соғылған алюминий дискілермен және LEXUS логотипі бар қызыл тежегіш суппорттарымен жабдықталған.
Спорттық интерьеріне келсек, салонда бүйірлік тірегі күшейтілген алдыңғы орындықтар, F SPORT логотипі бар қара сәндік элементтер, алюминий спорттық педальдар, ойықты былғары руль мен беріліс ауыстыру тұтқасы, арнайы дизайны бар 12,3 дюймдік цифрлық аспаптар панелі бар.
F SPORT-қа арналған түстер
Кузов түстерінің қатарында F SPORT үшін арнайы әзірленген Neutrino Gray түсі бар. Ол сұр түстің қатаң реңкін металл элементтерімен үйлестіріп, модельдің спорттық сипатын айқындайды.
Интерьердің үш түстік нұсқасының ішінде F SPORT-қа ғана тән Flare Red түсі ұсынылады.
Салонда жапон қылышының жүзін еске түсіретін «Хадори» алюминий сәндік панелі қолданылған. Оның ерекше фактурасы мұқият жылтырату арқылы жасалған.
OVERTRAIL+ нұсқасы
OVERTRAIL+ жинақтамасында дөңгелектерінің өлшемі 265/65R18-ден 265/70R18-ге дейін ұлғайтылды. Бұл жол талғамайтын жерде, соның ішінде тасты жолдарда көліктің өтімділігін арттырады.
Дөңгелектің протектор дизайны көлікке қуатты әрі берік көрініс берумен қатар, асфальтта қозғалған кезде шу деңгейін төмендетуге бағытталған.
LX600 жаңартулары
LX600 стандартты нұсқасына өткір V-тәрізді спицалары бар жаңа 20 дюймдік алюминий дискілер қосылды. Қараңғы түсті әрлеу көліктің агрессивті дизайнын айқындай түседі. Сонымен қатар, барлық жинақтамалар үшін жаңа White Nova Glass Flake шанақ түсі болды.
Бұл көліктердің бағалары –15,6 – 22,1 млн иен, шамамен 44,4 – 62,9 млн теңге болады.
Айта кететін жайт, қыркүйек айының басында Lexus жаңа NX кроссоверін таныстырған еді.
