Елена Рыбакина жарақатына байланысты Уханьдағы WTA 1000 турнирінен бас тартты

Қазақстандық теннисші, әлемнің бірінші ракеткасы Елена Рыбакина Қытайдың Ухань қаласында өтетін WTA 1000 турниріне қатыспайды. Бұған аяғындағы жарақат себеп болғанын жарыс ұйымдастырушылары хабарлады, деп жазады Kursiv.Media. 

Уханьдағы турнир 12-18 қазан аралығында өтеді. Рыбакина жарысқа бірінші нөмірлі теннисші ретінде қатысуы керек еді.

«Менің ойынымды күткен жанкүйерлерден кешірім сұраймын. Демалып, қалпыма келуім үшін біраз уақыт қажет. Түсіністік танытып, үнемі қолдау білдіріп жүргендеріңізге рақмет. Келесі жылы кездескенше», – деді Рыбакина. 

Бейжіңдегі жарыстан ерте шығып қалды

Бұл шешім Рыбакинаның Бейжіңдегі China Open турнирінен күтпеген жерден шығып қалуынан кейін қабылданды. Қазақстандық теннисші екінші айналымда әлем рейтингінде 118-орында тұрған Армения өкілі Алина Чараеваға 6:3, 4:6, 3:6 есебімен есе жіберді. Бұл оның US Open-дегі жеңісінен кейінгі алғашқы матчы еді. 

Рыбакинаны соңғы айларда аяқ пен табан тұсындағы жарақат мазалап жүр. Тамызда осыған байланысты Цинциннатидегі ширек финалды аяқтай алмаған. Кейін қалпына келіп, US Open-де чемпион атанып, әлемдік рейтингтің бірінші сатысына көтерілді. 

Әзірге Рыбакинаның маусымды толық аяқтағаны туралы ақпарат жоқ. WTA мәліметінше, оның келесі жоспарланған жарысы – Нинбодағы WTA 500 турнирі.