Құрылтай жанындағы мәслихаттар кеңесі қалай жұмыс істейді – түсіндіреміз

Құрылтай жанынан мәслихаттармен өзара іс-қимыл жөніндегі кеңес құрылады. Бұған дейін мұндай арнайы кеңес болмаған. Жаңа құрылымның мақсаты – мәслихаттармен тұрақты байланыс орнатып, өңірлердің ұсыныстары мен мәселелерін Құрылтай деңгейінде жедел қарау. Kursiv.media тілшісі кеңестің ерекшелігін түсіндіреді.

Кеңес не үшін қажет

Бұған дейін депутаттар өңірлерге барып, тұрғындардың ұсыныстары мен шағымдарын жинаған. Алайда мәслихаттармен жүйелі түрде жұмыс істейтін арнайы алаң болмаған.

Енді кеңес өңірлерден келетін ұсыныстарды жинақтап, оларды талқылауға мүмкіндік береді. Сонымен қатар қабылданған заңдардың өңірлерде қалай жүзеге асып жатқаны туралы кері байланыс алынады.

Құрылтай депутаттарының айтуынша, бұл құрылымның негізгі ерекшелігі мәслихаттармен жұмысты тұрақты жүйеге келтіру.

Мәслихаттар заң жобаларына қалай қатысады

Кеңестің маңызды бағыттарының бірі – заң жобаларын әзірлеу кезінде мәслихаттардың пікірін ескеру.

Өйткені әр өңірдің өзіндік ерекшелігі бар. Белгілі бір заңның жергілікті жерде қалай әсер ететінін мәслихат депутаттары жақсы біледі. Сондықтан олардың тәжірибесі мен ұсыныстарын заң жобаларын әзірлеу кезеңінде ескеру жоспарланып отыр.

Осы арқылы Құрылтай депутаттары заң жобаларын өңірлердің ерекшелігін ескере отырып, жедел әрі жан-жақты қарауға мүмкіндік алады.

Өңірлердің ұсыныстары қалай жеткізіледі

Өңірлермен тұрақты байланысты қамтамасыз ету үшін Құрылтайдың төрт депутатынан тұратын хатшылық жұмыс істейді. Әр депутатқа бес өңірден бекітіледі.

Хатшылық арқылы мәслихат төрағалары мен өңірлерден келетін ұсыныстар жинақталып зерделенеді.

Қажет болған жағдайда нақты мәселелерді талқылау үшін жұмыс топтары құрылады. Оларға Құрылтай және мәслихат депутаттарымен қатар сарапшылар, азаматтық қоғам өкілдері, мемлекеттік органдар мен ұйымдар тартылады.

Кеңес құрамына кімдер кіреді

Кеңес құрамына мәслихаттарда жұмыс істеген немесе олармен өзара іс-қимыл тәжірибесі бар Құрылтайдың тұрақты комитеттерінің депутаттары, саяси партиялар мен мемлекеттік органдардың өкілдері кіреді.

Сондай-ақ облыстардың, республикалық маңызы бар қалалар мен Астана мәслихаттарының төрағалары қатысады.

Бұл өңірлердің тікелей өкілдерінің кеңес жұмысына араласуына мүмкіндік береді.

Кеңес қандай мәселелерді қарайды

Кеңес аясында экология, әлеуметтік мәселелер, бюджет және басқа да өңірлер үшін маңызды бағыттар талқыланады.

Мәслихат төрағалары жұмыс топтарының отырыстарына, дөңгелек үстелдерге және заң жобаларын талқылауға қатыса алады. Қажет болған жағдайда белгілі бір мәселе бойынша өңірлік сарапшылар да тартылады.

Осылайша, сарапшылар шеңберін кеңейтіп, әр өңірдің тәжірибесін ескеру көзделіп отыр.

Кеңес мүшелеріне жалақы төлене ме

Құрылтай депутаты Илья Теренченконың айтуынша, кеңес мүшелеріне жалақы төленбейді. Кеңес ақысыз негізде жұмыс істейді.

Оны құруға және қызметін қамтамасыз етуге республикалық бюджеттен қаражат бөлу де жоспарланбаған.

«Жалақы қарастырылмаған. Кеңес ақысыз негізде жұмыс істейді. Бюджеттен ешқандай шығын қарастырылмаған және жоспарланбайды», – деді Илья Теренченко.

Кеңес жұмысы ашық бола ма

Кеңес жұмысының нәтижелері мен мәслихаттардан түсетін ұсыныстар қоғамға ашық жарияланып отырады. Ақпарат Құрылтайдың ресми сайтында жарияланады. Сонымен қатар мәслихаттар өздерінің ресми парақшаларында тиісті мәліметтерді орналастыра алады.

Осылайша, жаңа кеңес Құрылтай мен мәслихаттар арасындағы тұрақты байланыс алаңына айналмақ. Негізгі өзгеріске өңірлердің ұсыныстары мен тәжірибесін тек жинап қана қоймай, оларды заң жобаларын әзірлеу және қабылданған заңдардың орындалуын бағалау процесіне жүйелі түрде енгізу жатады.