Рамзан Кадыровқа «Ресейдің құрметті сәулетшісі» атағы берілді

Шешенстан басшысы Рамзан Кадыров «Ресейдің құрметті сәулетшісі» белгісімен марапатталды. Бұл туралы «Чечня Сегодня» басылымы хабарлады, деп жазады Kursiv.Media.

Марапатты Ресей үкіметі төрағасының орынбасары Марат Хуснуллин Владимир Путин атындағы ауданда Ахмат-Хаджи Кадыров атындағы бульвардың ашылу салтанатында табыстаған.

Хуснуллин Кадыровты аталған ауданның бас сәулетшісі деп атады. Оның айтуынша, аудан Кадыровтың жеке бақылауымен жоспарланып жобаланған.

«Осы жобалардың бас сәулетшісі – өзіңізсіз», – деді Хуснуллин Кадыровқа.

Бұған дейін 5 қазанда Кадыров Ресей мұсылмандарының рухани жиналысының ең жоғары марапаты – Ресей империясының алғашқы мүфтиі Мұхамеджан Хусаинов атындағы I дәрежелі орденмен марапатталған.

Сол күні Мәскеу және Орыс патриархы Кирилл де Кадыровты 50 жасқа толуына орай I дәрежелі «Даңқ және абырой» орденімен марапаттады. Патриарх Шешенстан басшысын мерейтойымен құттықтап, Грозный епархиясы мен Шешенстан арасындағы қарым-қатынасты одан әрі дамытуға үміт білдірді.