Ақмолада кәсіпкерлікке заңсыз араласқан әкім жазаланды

Ақмола облысында Үлгі ауылдық округінің әкімі кәсіпкерлік қызметке заңсыз араласқаны үшін әкімшілік жауапкершілікке тартылды. Бұзушылық жер учаскесін беру конкурсы кезінде анықталған, деп хабарлайды Кursiv.Media.

Біржан сал ауданының прокуратурасы «Zere Agro Holding» ЖШС-нің құқықтарына нұқсан келгенін анықтады. Компания 600 млн теңгеге мал бордақылау алаңын салу жобасын жүзеге асыруды жоспарлап отыр. Жоба аясында 10 жұмыс орнын ашу көзделген.

Тексеру барысында ауыл әкімі конкурсқа қатысушылардың біріне мемлекеттік тіркеу деректеріне сәйкес келмейтін тұрғылықты жері туралы анықтама бергені белгілі болды. Осы құжат негізінде жер комиссиясы қатысушыға негізсіз қосымша балл беріп, конкурс нәтижесіне әсер еткен.

Прокуратураның шараларынан кейін әкім Әкімшілік құқық бұзушылық туралы кодекстің 173-бабының 1-бөлігі бойынша жауапқа тартылды. Сонымен қатар, сот жер конкурсының нәтижесін жойды.

Қазіргі уақытта «Zere Agro Holding» ЖШС-не инвестициялық жобаны іске асыру үшін жер учаскесін беру мәселесі прокуратураның бақылауында.