Биыл жәрдемақы мен зейнетақы төлеуге бюджеттен қанша қаражат жұмсалды

Қаржы министрі Мәди Тәкиев 2026 жылғы 13 қазанда Үкімет отырысында бюджеттен зейнетақы мен жәрдемақы төлеуге, сондай-ақ өңірлерді қолдауға бағытталған қаражат көлемін атады, деп хабарлайды Kursiv.media.  

Министрдің нақтылауынша, мемлекеттік бюджеттің шығыстары 98%-ға орындалған. Қаржыландыру көлемі 26,2 трлн теңгені құрады.

«Республикалық бюджеттің орындалуы 99,6%-ға жетті. Шығыстар көлемі 19,6 трлн теңгені құрады. Оның ішінде 5,3 трлн теңге зейнетақы мен жәрдемақы төлеуге, 4,4 трлн теңге өңірлерді қолдауға, ал 2 трлн теңге нақты секторды қолдауға бағытталды. Сонымен қатар, жергілікті бюджеттердің орындалуы 96,3%-ды немесе 11,9 трлн теңгені құрады. Орындалмаған шығыстар көлемі – 458,4 млрд теңге», – деді Мәди Тәкиев.

Мәди Тәкиев келесі қаржы жылында өңірлерге берілетін трансферттер көлемі 1,2 трлн теңгеге артатынын атап өтті.

Айта кетейік, биылғы қаңтар-қыркүйек айларында трансферттерді есептемегенде, мемлекеттік бюджеттің кірісі 20,2 трлн теңгені құрады. Бұл өткен жылмен салыстырғанда 2,8 трлн теңгеге көп.

Сонымен қатар салық түсімдері бір жылда 3 трлн теңгеге өсіп, өсу қарқыны 130,3%-ды құрады.