Павлодарлық ипотека рәсімдеуге көмектесемін деп 80 млн теңгеге алаяқтық жасаған

Павлодар қаласының 26 жастағы тұрғыны ипотекалық несие рәсімдеуге көмектесуге уәде беріп, азаматтарды шамамен 80 млн теңгеге алдаған, деп хабарлайды Kursiv.Media.

Сот оны ірі мөлшерде бірнеше рет алаяқтық жасағаны үшін кінәлі деп танып, амнистияға байланысты үш жылға бас бостандығынан айыру жазасын тағайындады.

Тергеу деректеріне сәйкес, ер адам 2025 жылдың қыркүйегінен 2026 жылдың ақпанына дейін тұрғындарға өзіне тиесілі жауапкершілігі шектеулі серіктестік арқылы кеңес беру қызметтерін ұсынған. Ол «Отбасы банк» арқылы ипотекалық несие рәсімдеуге, жеңілдетілген автонесие алуға және «Даму» қорының бағдарламалары бойынша қаржыландыруға көмектесуге уәде берген.

Азаматтар оның сөзіне сеніп, бірнеше миллион теңгеге дейін бастапқы жарна төлеген. Алайда ер адам алған ақшаны уәде етілген мақсаттарға жұмсамай, өз қажетіне пайдаланған. Іс материалдарында жалпы сомасы шамамен 80 млн теңгені құрайтын 24 алаяқтық дерегі бар. Ол келтірілген шығынның аз ғана бөлігін қайтарған.

Қылмыстық іс Павлодар қаласының қылмыстық істер жөніндегі ауданаралық сотында қаралды. Сот бастапқыда ер адамға төрт жылға бас бостандығынан айыру жазасын тағайындаған. Алайда 2026 жылғы 1 шілдедегі жаңа Конституцияның қабылдануына байланысты рақымшылық жасау туралы заң негізінде жазаның өтелмеген бөлігі төрттен біріне қысқартылды.

«2026 жылғы 13 қазандағы жағдай бойынша бас бостандығынан айыру түріндегі өтелмеген негізгі жаза мерзімі төрт жылдан үш жылға дейін қысқартылсын», – деді судья Ғабит Ахметов.

Сотталушы кінәсін толық мойындап, жәбірленушілердің азаматтық талаптарына қарсылық білдірмеген. Сондай-ақ оған келтірілген шығынды толық өтеу міндеті жүктелді.