Әнші Димаш Құдайберген 2026 жылғы 12 желтоқсанда Индонезияда алғаш рет жеке концерт өткізеді. DIMENSIONS WORLD TOUR әлемдік турнесі аясында өтетін концерттің билеті 21 мыңнан 218 мың теңгеге дейін жетеді, деп хабарлайды Kursiv.Media.
Концерт Индонезиядағы Sentul International Convention Center кешенінде өтеді. Бұл Димаш Құдайбергеннің аталған елдегі алғашқы жеке концерті болмақ.
Димаштың концертіне билет қанша тұрады?
Ұйымдастырушылар концерт билеттерін алты санатқа бөлген. Олардың бағасы 850 мыңнан 8,7 млн Индонезия рупиясына дейін жетеді.
Қазақстан Ұлттық банкінің 14 қазандағы бағамымен есептегенде, билет құны шамамен 21 мыңнан 218 мың теңгеге дейін барады.
| Билет санаты | Рупиямен | Теңгемен (шамамен) |
|---|---|---|
| VVIP | 8 700 000 | 218 100 теңге |
| VIP | 4 800 000 | 120 300 теңге |
| CAT 1 | 2 800 000 | 70 200 теңге |
| CAT 2 | 1 800 000 | 45 100 теңге |
| CAT 3 | 1 250 000 | 31 300 теңге |
| CAT 4 | 850 000 | 21 300 теңге |
Ең қымбат VVIP билетін сатып алған жанкүйерлер концерт алдындағы арнайы кешке қатысып, VIP демалыс аймағына кіре алады. Сондай-ақ оларға эксклюзивті кәдесыйлар, тегін сусындар мен жеңіл тағамдар ұсынылады.
Ал VIP санатындағы билет иелеріне концертке кірумен қатар арнайы кәдесыйлар беріледі.
Билеттер қашан сатылымға шығады?
Билеттердің алдын ала сатылымы 25 қазанда Folago Privé қатысушылары үшін басталады. Ал жалпы сатылым 26 қазанда ашылады. Ұйымдастырушылар концерт залындағы барлық орын отыруға арналғанын хабарлады.
Айта кетейік, Димаш Құдайбергеннің Индонезиядағы концерті DIMENSIONS WORLD TOUR халықаралық турнесінің бір бөлігі болады. Осылайша, қазақстандық әнші әлемдік турнесінің географиясын кеңейтіп, Оңтүстік-Шығыс Азиядағы жанкүйерлерімен алғаш рет жеке концерт форматында кездеседі.
Ал қараша айында Димаш Құдайберген DiMENSIONS турнесімен Латын Америка елдерінде концерт береді.
