FlyArystan Ақтаудан Ыстанбұлға тікелей рейстерін қайта ашады

FlyArystan әуекомпаниясы Ақтаудан Ыстанбұлға тікелей рейстерін қайта ашады, деп хабарлайды Kursiv.Media.

Қайта ашылған бағыт бойынша алғашқы рейс 2026 жылғы 22 қазанда орындалады, содан кейін рейстер тұрақты кестеге көшеді.  

 «27 қазаннан бастап Ақтау мен Ыстанбұл арасындағы рейстер аптасына екі рет – сейсенбі және сенбі күндері орындалады. Тікелей әуе қатынасы Маңғыстау облысының тұрғындарына Түркияның ең ірі қаласына ауысып отырмай сапарлауға мүмкіндік береді», – делінген хабарламада.

Сейсенбі күндері әуе кемесі Ақтаудан сағат 08:40-та ұшып, Ыстанбұлға сағат 10:35-те қонады. Кері рейс Ыстанбұлдан сағат 11:40-та ұшып, Ақтауға сағат 17:05-те келеді.   Сенбі күндері Ақтаудан ұшу уақыты сағат 08:35-ке, ал қону уақыты сағат 10:30-ға жоспарланған.

Кері бағытта әуе кемесі сағат 11:15-те ұшып, Ақтауға сағат 16:40-та қонады. Уақыт әр әуежайдың жергілікті уақытымен көрсетілген.  

Ақтау Қазақстанның батысындағы хаб ретінде FlyArystan әуекомпаниясының халықаралық маршруттық желісінде маңызды орын алады. Қазіргі уақытта әуекомпания Ақтаудан Кутаиси, Баку, Дубай, Батуми және Үрімші қалаларына халықаралық рейстер орындайды.

Сонымен қатар 2026 жылғы 16 желтоқсаннан бастап Ақтау мен Ереван арасында аптасына екі рет – сәрсенбі және жұма күндері тікелей рейстерді іске қосу жоспарланып отыр.

Мұның алдында FlyArystan Алматы-Чунцин-Алматы бағыты бойынша жаңа халықаралық рейсті іске қосатынын хабарлаған еді.