Қазақстанда жаңа Kia Seltos қараша айында сатылымға шығады
Kia Seltos кроссоверінің екінші буыны Қазақстан нарығына қараша айында келеді. Жаңарған модельдің дизайны өзгеріп, салоны заманауи технологиялармен толықтырылған.
Дизайны мен өлшемдері өзгерді
Allur компаниялар тобына кіретін Kia Qazaqstan жаңа Seltos моделін қараша айында Қазақстан нарығына ұсынады. Кроссовер Kia-ның «Қарама-қайшылықтардың бірлігі» атты дизайн тұжырымдамасына сай жасалған.
Көліктің сыртқы келбеті жаңарып, радиатор торы кеңейген. Жарық шамдары Star Map стилінде жасалған, есік тұтқалары шанаққа кіріктірілген
Жаңа Seltos бұрынғыдан ірілеу болды: ұзындығы – 4 460 мм, ені – 1 830 мм, биіктігі – 1 600 мм. Дөңгелек базасы 2 690 мм-ге дейін ұлғайған. Бұл салондағы кеңістікті арттыруға мүмкіндік береді.
Салоны мен технологиялары
Кроссовердің салонында 27 дюймдік панорамалық мультимедиа дисплейі және 10 дюймдік аспаптар панелі бар. Сондай-ақ панорамалық шатыр мен алдыңғы әйнекке ақпарат шығаратын проекциялық дисплей қарастырылған.
Модель Kia K3 платформасына негізделген. Өндіруші шанақтың қаттылығы күшейтіліп, аспа жүйесінің баптаулары жетілдірілгенін және салонның дыбыс оқшаулауы жақсарғанын атап өтті.
Қазақстанда қандай нұсқасы сатылады
Әлемдік модельдер қатарында қуаты 115-тен 200 ат күшіне дейінгі бензин қозғалтқыштары бар. Қазақстанда қуаты 200 ат күшіне тең қозғалтқышпен және толық жетек жүйесімен жабдықталған нұсқа ұсынылады.
Жаңа Seltos жүргізушіге көмектесетін ADAS жүйелерімен де жабдықталған. Бұл технологиялар жол жағдайын бақылауға және көлікті басқару кезінде жүргізушіге көмектесуге арналған.
Бағасы қашан белгілі болады
Жаңа Kia Seltos 2026 жылғы қарашада Қазақстандағы ресми дилерлік орталықтарға жеткізіледі. Қазақстан нарығына арналған жинақтамалары, техникалық сипаттамалары, бағасы және сатылымның нақты басталу күні кейінірек жарияланады.
Тағы да оқыңыз: Kia Seltos жаңа деңгейге шықты: екінші буыны несімен ерекшеленеді
