Бір күнге пәтер жалдау қанша тұрады
Қазақстанда ішкі туризмге сұраныс артқан сайын, сапар кезінде лайықты баспана таңдау мәселесі де өзекті болып тұр. Әсіресе бір-екі күнге жалдайтын пәтерлерге сұраныс жоғары. Баға қалаға, пәтердің бөлме саны мен орналасқан жеріне қарай өзгереді. Krisha.kz сервисінің мәліметінше, Алматы, Астана, Қарағанды және Балқаш қалаларында пәтерді онлайн таңдап, қажетті күндерге брондауға болады, деп жазады Kursiv.Media.
Қай қалада пәтер жалдау қымбат, қайсысында арзан
Пәтерді тәулігіне жалдау бағасы ең жоғары қалалар – Алматы мен Астана.
- Алматыда бір бөлмелі пәтерді жалдау тәулігіне 16 000 теңге, екі бөлмелі – 22 000 теңге, ал үш бөлмелісі 35 000 теңге тұрады.
- Астанада баға сәл төмен: бір бөлмелі пәтер – 15 000 теңге, екі бөлмелі – 19 000 теңге, үш бөлмелі – 30 000 теңге.
Бір бөлмелі пәтерді ең арзан жалға алуға болатын қалалар – Ақтау, Ақтөбе, Талдықорған, Тараз, Түркістан және Орал. Бұл қалаларда тәуліктік жалдау ақысы шамамен 10 000 теңгеден басталады.
Ал кең пәтерлердің бағасы қалаларға қарай айтарлықтай өзгереді. Мәселен, Түркістанда үш бөлмелі пәтерді тәулігіне 15 000 теңгеге жалдауға болса, Оралда мұндай пәтер бағасы 25 000 теңгеге жетеді.
Қалаларда пәтерді тәулігіне жалдау құны
| Қала | 1 бөлмелі пәтер | 2 бөлмелі пәтер | 3 бөлмелі пәтер |
|---|---|---|---|
| Ақтау | 10 000 ₸ | 15 000 ₸ | 20 000 ₸ |
| Ақтөбе | 10 000 ₸ | 15 000 ₸ | 20 000 ₸ |
| Алматы | 16 000 ₸ | 22 000 ₸ | 35 000 ₸ |
| Астана | 15 000 ₸ | 19 000 ₸ | 30 000 ₸ |
| Атырау | 12 000 ₸ | 15 000 ₸ | 22 000 ₸ |
| Жезқазған | 13 000 ₸ | 16 000 ₸ | 25 500 ₸ |
| Қарағанды | 12 000 ₸ | 16 000 ₸ | 20 000 ₸ |
| Көкшетау | 12 000 ₸ | 15 000 ₸ | 20 500 ₸ |
| Қонаев | 12 000 ₸ | 15 500 ₸ | 30 000 ₸ |
| Қостанай | 12 000 ₸ | 18 000 ₸ | 25 000 ₸ |
| Қызылорда | 12 000 ₸ | 15 000 ₸ | 20 000 ₸ |
| Павлодар | 12 000 ₸ | 16 000 ₸ | 24 000 ₸ |
| Петропавл | 14 000 ₸ | 18 000 ₸ | 25 000 ₸ |
| Семей | 12 000 ₸ | 15 000 ₸ | 20 000 ₸ |
| Талдықорған | 10 000 ₸ | 15 000 ₸ | 18 000 ₸ |
| Тараз | 10 000 ₸ | 13 000 ₸ | 18 000 ₸ |
| Түркістан | 10 000 ₸ | 15 000 ₸ | 15 000 ₸ |
| Орал | 10 000 ₸ | 16 000 ₸ | 25 000 ₸ |
| Өскемен | 12 000 ₸ | 16 000 ₸ | 25 000 ₸ |
| Шымкент | 15 000 ₸ | 17 000 ₸ | 21 000 ₸ |
Ескерту: бағалар Krisha.kz сайтындағы тәуліктік жалға берілетін пәтерлер туралы хабарландырулардың медианалық құны негізінде берілген. Сомалар – теңгемен, бір тәулікке есептелген. Нақты баға пәтердің орналасқан жеріне, жағдайына және тұру күніне байланысты өзгеруі мүмкін. Мереке және демалыс күндері баға жоғары болуы ықтимал.
Саяхаттау кезінде ақшаны қалай үнемдеуге болады
Егер отбасыңызбен немесе достарыңызбен саяхаттасаңыз, бірнеше қонақүй бөлмесін алғаннан гөрі, кең пәтерді жалдау тиімді болуы мүмкін. Ал тамақты үйде дайындау арқылы ас-ауқатқа кететін шығынды да азайтуға болады.
Пәтер жалдамас бұрын оның орналасқан жерін, жатын орын санын, қоныстану және шығу шарттарын мұқият тексерген жөн.
Тағы да оқыңыз: Студенттер Астананың қай ауданында 80 мың теңгеге пәтер жалдай алады
