Патриоттық әндер байқауы жарияланды: жүлде қоры

Тәуелсіздіктің 35 жылдығына орай республикалық патриоттық әндер байқауы өтеді. Байқаудың жалпы жүлде қоры – 30 млн теңге, деп хабарлайды Kursiv.Media Мәдениет және ақпарат министрлігіне сілтеме жасап.

Байқаудың мақсаты – Отан, туған жер және ел бірлігі тақырыбындағы жаңа әндерді анықтап, талантты ақындар мен композиторларды қолдау, сондай-ақ заманауи патриоттық әндер қорын толықтыру. Байқауға елдің барлық өңірінен ақындар мен композиторлар, соның ішінде шығармашылық жолын енді бастаған авторлар қатыса алады. Ұйымдастырушылар бұрын жарияланбаған және орындалмаған әндерді қабылдайды.

Қатысушылар шығармаларын үш бағыт бойынша ұсына алады:

салтанатты патриоттық әндер;
лирикалық патриоттық әндер;
заманауи патриоттық әндер.

Туындыларды композиторлардан, ақындардан және музыка мамандарынан құралған сарапшылар кеңесі бағалайды. Бағалау кезінде әннің әуені, мәтінінің сапасы, авторлық идеяның жаңалығы және тыңдарманға әсері ескеріледі.

Байқаудың жүлде қоры:

Бас жүлде – 6 млн теңге;
I орын – әрқайсысы 4 млн теңгеден үш жүлде;
II орын – әрқайсысы 3 млн теңгеден үш жүлде;
III орын – әрқайсысы 1 млн теңгеден үш жүлде.

Ұйымдастырушылардың мәліметінше, жүлде қоры демеушілер есебінен қалыптастырылған.

Өтінімдер 2026 жылғы 5 желтоқсанға дейін khabar.kz/konkurs сайты арқылы қабылданады. Жеңімпаздар Қазақстанның Тәуелсіздік күні қарсаңында жарияланады.

Жобаның бас ақпараттық серіктесі – «Хабар» агенттігі» АҚ.

Оқи отырыңыз: Астанада Республика күні 120-дан астам іс-шара өтеді