Республика күніне орай Астанада ауыл шаруашылығы жәрмеңкесі өтеді
Астаналықтар алдағы демалыс күндері Қарағанды және Қостанай облыстарының өнімдерін тікелей өндірушілерден сатып ала алады. 24-25 қазанда Республика күніне орай елордада өңірлердің ауылшаруашылық жәрмеңкесі өтеді, деп хабарлайды Kursiv.Media.
Екі өңір жәрмеңкеге жалпы көлемі мың тоннаға жуық ауыл шаруашылығы және азық-түлік өнімін жеткізеді.
Қарағанды облысы қандай өнімдер әкеледі
Өңірден Астанаға 583 тоннадан астам өнім жеткізіледі. Оның ішінде:
- картоп – 310 тонна;
- еттің барлық түрі – 134,7 тонна;
- көкөніс – 80 тонна;
- сүт өнімдері – 15 тонна;
- балық – 7,5 тонна;
- бакалея өнімдері – 36 тонна;
- тауық жұмыртқасы – 310 мың дана.
Қостанай облысы қандай өнім ұсынады
Қостанай облысы 400 тоннадан астам өнімнің 100-ден аса түрін әкеледі. Атап айтқанда:
- еттің әр түрі – 49 тонна;
- сүт өнімдері – 31 тонна;
- шұжық өнімдері мен еттен жасалған жартылай фабрикаттар – 23 тонна;
- жарма және макарон өнімдері – 30 тонна;
- картоп пен көкөніс – 90 тонна;
- ұн – 40 тонна;
- нан-тоқаш және кондитерлік өнімдер, сусындар, бал және басқа да тауарлар.
Жәрмеңкеге екі облыстан 140-тан астам ауыл шаруашылығы тауарын өндіруші мен кәсіпорын қатысады.
Ұйымдастырушылардың мақсаты – елорда тұрғындарына сапалы азық-түлік өнімдерін қолжетімді бағамен ұсыну, отандық өндірушілерді қолдау және тауарды делдалсыз, тікелей өндірушіден тұтынушыға жеткізуге мүмкіндік жасау.
Жәрмеңке қайда өтеді
Жәрмеңке «Қазанат» ипподромының автотұрағында, Қарқаралы тасжолы, 1 мекенжайында ұйымдастырылады. Жәрмеңке екі күн бойы 09:00-ден 18:00-ге дейін жұмыс істейді.
Тұрғындар мен қала қонақтарына ыңғайлы болу үшін жәрмеңке өтетін орынға №18, 37 және 303 автобус бағыттары қатынайды.
Тағы да оқыңыз: Республика күні: Астанада концерттер қайда өтеді және кімдер өнер көрсетеді
