Пәтерлер мен жатақханалар тексеріледі: полицейлер рейдке шықты
Елдегі полиция қызметкерлері тұрғын үйлерді аралап, жалға берілетін пәтерлерді, жатақханалар мен қонақүйлерді тексеруде. Олар тұрғындардың тіркеуде бар-жоғын анықтап, көршілерден түскен шағымдарды қарайды және қоғамдық тәртіптің сақталуын бақылайды. Бұл «Қауіпсіз аула» жедел-профилактикалық рейд аясында жүргізіліп жатыр.
Полиция нені тексереді
Рейд барысында бірнеше мәселеге назар аударылады:
- Тұрғылықты жері бойынша тіркеу. Пәтерде немесе басқа нысанда тұратын адамдардың тіркеуде бар-жоғы тексеріледі.
- Тыныштық пен жолдағы тәртіп. Түнгі шудың, дрифттің және көлікті қауіпті жүргізу деректерінің бар-жоғы анықталады.
- Балалардың қауіпсіздігі. Кәмелетке толмағандардың заң бұзбауы, сондай-ақ олардың көмекке мұқтаж еместігі назарға алынады.
- Қару сақтау талаптары. Қару иелерінің тиісті құжаттары бар-жоғы және сақтау ережелерінің орындалуы тексеріледі.
- Көршілердің шағымдары. Тұрғындар жиі шағымданатын мекенжайлардағы жағдай зерделенеді.
Рейд кезінде қандай заң бұзушылықтар анықталды
Полиция қызметкерлері ел бойынша 170 мыңнан астам үй мен пәтерді тексерген.
Тексеру нәтижесінде:
- 8 мыңға жуық адам тұрғылықты жері бойынша тіркеусіз тұрған;
- 7 мыңнан астам адам бұзақылық жасағаны үшін жауапкершілікке тартылған;
- көршілердің шағымдары бойынша есірткіге мас күйдегі 400 адам анықталған;
- тіркелмеген 62 қару тәркіленген.
Рейдтер қашан аяқталады
«Қауіпсіз аула» рейдтері Қазақстанның барлық өңірінде жүргізіліп жатыр. Тексерулердің аяқталу мерзімі әр аймақта әртүрлі. Мәселен, Алматыда рейдтер 5 қарашаға дейін жалғасады. Ал Астанада полиция тұрғындарға тәртіп ережелерін еске салу үшін дауыс зорайтқыштар орнатылған дрондарды пайдаланып жатыр
