Қазақстан 8 айда 407 мың компьютер импорттаған
2026 жылдың қаңтар–тамызында Қазақстанға 28 елден 406,9 мың дана компьютер әкелінген. Kursiv Media ноутбук және компьютер тауарларының импорты қай елден келетінен зерттеп көрді. Импортталған техниканың жалпы салмағы 661 тоннаны құрады. Негізгі жеткізуші – Қытай: елге келген әр бес компьютердің шамамен төртеуі осы мемлекеттен жеткізілген.
Қытайдың үлесі 82%-дан астам
Қытайдан Қазақстанға 334,3 мың компьютер импортталған. Бұл жалпы әкелінген компьютерлер санының шамамен 82,2%-ына тең.
Жеткізілімнің құны 158,7 млн доллар, ал бір компьютердің орташа импорттық бағасы 475 доллар болған. Қытай берілген тізімде компьютер саны, әрі ақшалай құны бойынша көш бастап тұр.
Қазақстанға компьютерлер қайдан келеді?
Қытай
Вьетнам
Тайвань
Таиланд
Ресей
Гонконг (Сянган АӘА)
Оңтүстік Африка
АҚШ
Германия
МалайзияВьетнамнан 25 мыңнан астам компьютер келген
Екінші ірі жеткізуші – Вьетнам. Бұл елден 25,2 мың компьютер әкелінген. Олардың жалпы құны 10,2 млн доллар, бір компьютердің орташа бағасы 404 доллар деп көрсетілген.
Вьетнамның жалпы импорттағы саны бойынша үлесі шамамен 6,2% болған. Қытай мен Вьетнамнан жалпы 359,5 мың компьютер жеткізілген. Яғни осы екі елдің үлесіне импортталған компьютерлердің 88,4%-ы тиесілі.
Гонконг санымен, Тайвань құнымен ерекшеленеді
Сянган арнайы әкімшілік ауданынан, яғни Гонконгтан 6,9 мың компьютер келген. Жеткізілім құны 1,3 млн доллар, бір данасының орташа импорттық бағасы 194 доллар болған. Бұл суретте көрсетілген 10 жеткізуші арасындағы ең төмен орташа баға.
Ал Тайваньнан 801 компьютер әкелінгенімен, олардың жалпы құны $2,5 млн-ға жеткен. Бір компьютердің орташа бағасы 3 105 доллар деп көрсетілген.
Осылайша, жеткізілген компьютер саны аз болғанымен, Тайвань ақшалай құны бойынша Қытай мен Вьетнамнан кейінгі үшінші орынға шыққан.
Ресейден 3,3 мың, Таиландтан 1,5 мың компьютер
Ресейден Қазақстанға 3,3 мың компьютер импортталған. Олардың жиынтық құны 1,8 млн доллар, орташа бағасы бір данасына 553 доллар болған.
Таиландтан 1,5 мың компьютер жеткізілген. Жалпы құны –1,9 млн доллар, бір данасының орташа бағасы – 1 281 доллар.
Таиландтан келген компьютер саны Ресейден аз болғанымен, жеткізілімнің ақшалай құны жоғары болған.
Ең жоғары орташа баға – Оңтүстік Африкада
Көрсетілген ондықта бір компьютердің ең жоғары орташа импорттық бағасы Оңтүстік Африкадан келген техникада тіркелген — 7 886 доллар. Бұл елден 63 компьютер әкелініп, олардың жалпы құны 497 мың доллар болған.
Германиядан 36 компьютер жеткізілген. Жиынтық құны 225 мың доллар, ал бір компьютердің орташа бағасы 6 242 доллар деп көрсетілген.
АҚШ-тан 140 компьютер импортталған. Олардың жалпы құны 413 мың доллар, орташа бағасы 2 951 доллар болған.
Малайзиядан келген 61 компьютердің құны 56 мың долларды құраған. Бір данасының орташа импорттық бағасы — 923 доллар.
Он жеткізушіден келген импорт құны — $177,6 млн
Суретте сомасы көрсетілген негізгі 10 жеткізушіден әкелінген компьютерлердің жиынтық құны шамамен 177,6 млн доллар болды.
Осы ондықтың ақшалай көлеміндегі Қытайдың үлесі 89,4%-ды құрайды. Ал Қытай, Вьетнам және Тайваньның жиынтық үлесі 96,5%-ға жетеді.
Бұл есеп тек көрсетілген 10 жеткізушіге қатысты. Қазақстанға компьютер жеткізген барлық 28 ел бойынша жалпы импорт құны берілген суреттерде көрсетілмеген.
Импорттық баға мен дүкен бағасы бірдей емес
Инфографикадағы бір данаға шаққандағы сома – орташа импорттық баға. Ол дүкендегі бөлшек сауда бағасын білдірмейді.
Елдер арасындағы баға айырмасының себебін нақтылау үшін компьютерлердің моделі, техникалық сипаттамасы және жеткізілім құрамы туралы қосымша мәлімет қажет. Сондықтан орташа бағаның жоғары болуы өздігінен техниканың сапасы жоғары екенін білдірмейді.
