1,5 тонна жүкті сүйрей алады: Chery жаңа Tiggo X7 кроссоверін таныстырды

Chery компаниясы Tiggo 7 кроссоверінің жаңа буынын және жолсыз жермен жүруге бейімделген Tiggo X7 нұсқасын таныстырды. Бұл туралы Autocar басылымы хабарлады.

Tiggo X7 — Tiggo X деп аталатын жаңа модельдер топтамасының алғашқы өкілі. Жаңа нұсқаға жол талғамайтын шиналар, доңғалақ доғаларына арналған пластик қаптамалар және сүйреу ілмектері орнатылған.

Chery Tiggo X7 жолсыз жермен жүруге дайындалған

Tiggo X7-нің кәдімгі отбасылық кроссоверден айырмашылығы ең алдымен сыртқы дизайнынан байқалады. Көліктің шанағы бұрышты пішінде жасалған. Сонымен қатар радиатор торы U тәрізді жаңа дизайнға ие болып, бамперлері өзгертілген. Төбесіне ірі рейлингтер орнатылған.

Алдыңғы бампердің төменгі бөлігінде қорғаныш тақтасына ұқсас сәндік элемент бар. Сары түсті сүйреу ілмектері де көліктің жол талғамайтын бейнесін айқындай түседі.

Chery Tiggo X7 әртүрлі жол жағдайына арналған алты қозғалыс режимімен жабдықталады деп күтілуде. Олардың қатарында қар, лай, құм, тас жолсыз жер және су кедергілерінен өту режимдері бар.

Дегенмен жаңа модельдің техникалық сипаттамалары әзірге толық жарияланған жоқ. Сондықтан оның асфальттан тыс жерлердегі нақты мүмкіндіктеріне баға беруге әлі ерте.

Салоны мен техникалық мүмкіндіктері

Tiggo X7 бес орындық салонмен және көлденең орналасқан мультимедиа жүйесінің экранымен жабдықталады. Сондай-ақ көлік салмағы 1 500 келіге дейінгі тіркемені сүйрей алуы мүмкін.

Chery әзірге жаңа модельдердің қозғалтқыштары, бағасы және қай нарықтарда сатылатыны туралы ақпарат жариялаған жоқ. Tiggo X7-нің сериялық өндірістегі нұсқасы 2027 жылы таныстырылады деп күтілуде. Ал Оңтүстік Африкада оның тұсаукесері сол жылдың үшінші тоқсанында өтуі мүмкін.

Chery Tiggo 7 жаңа буынға өтті

Компания жаңа Chery Tiggo 7 моделін де көрсетті. Ол күнделікті сапарларға арналған, кеңдікке, жайлылық пен қауіпсіздікке басымдық берілген отбасылық кроссовер ретінде ұсынылып отыр.

Тағы да оқыңыз: Chery-дің премиум бренді Exlantix Қазақстан нарығына кіреді