Израильдегі парламент сайлауында соңғы 45 жылдағы рекорд тіркелді

Израильде парламент сайлауына халықтың 16,68%-ы қатысқан, яғни шамамен 1,2 млн адам. Көрсеткіш соңғы 45 жылдағы рекорд болып отыр, деп жазады Kursiv Media.

«Едиот Ахронот» газетінің хабарлауынша, мұндай мәліметті Израильдің орталық сайлау комиссиясы ұсынған.

Сарапшылар жоғары белсенділікті 2023 жылғы 7 қазандағы ХАМАС шабуылынан кейінгі алғашқы сайлаумен байланыстырады. Олардың пікірінше, көп азамат дауыс беру арқылы үкіметтің шабуыл кезіндегі және одан кейінгі әрекеттеріне қатысты ұстанымын білдіргісі келеді.

Кнессеттегі 120 орынға 36 партияның кандидаттары таласып жатыр. Елде дауыс беру құқығына ие 7,3 миллион азамат бар. Барлығы 12 018 сайлау учаскесі ашылған. Олар жергілікті уақыт бойынша сағат 07:00-ден 22:00-ге дейін жұмыс істейді.

Қоғамдық тәртіпті 20 мың полиция қызметкері, шекара полициясының өкілдері мен еріктілер қамтамасыз етіп жатыр.

Сайлау кезінде Израиль әскері Палестина аумақтарын қоршау режимін енгізіп, Иордан өзенінің Батыс жағалауындағы барлық өткізу бекетін жапты.

Сайлау учаскелері жабылғаннан кейін телеарналар экзитпол нәтижелерін жариялайды. Одан соң дауыстарды санау басталады. Сайлау қорытындысы бойынша Кнессеттің 26-шақырылымының құрамы анықталып, үкіметтік коалиция құру процесі басталады.

Оқи отырыңыз: Сербиядағы сайлау: Вучич жеңілгенін мойындады