Үш қалада әскери қалашықтар салынады

Алматы, Түркістан және Жезқазған қалаларында жаңа әскери қалашықтар салынып жатыр. Сонымен қатар Орал, Қызылорда және Атырау қалаларында казармалар бой көтереді, деп хабарлайды Kursiv.media.

Президент Қасым-Жомарт Тоқаев Қазақстан халқына жолдауында 2027 жылды жалпыұлттық ауқымды құрылыс жылы деп жариялаған болатын. Осыған байланысты ұлттық ұланның әскери инфрақұрылымын дамыту және қолданыстағы нысандарды жаңғырту жұмыстары жүргізіліп жатыр.

Жаңа әскери қалашықтарда әкімшілік ғимараттар, әскери қызметшілерге арналған тұрғын үйлер, әскери техника тұрақтары мен қоймалар салынады. Бұл нысандар әскери қызметшілердің тұруына, қызмет атқаруына және жауынгерлік міндеттерді орындауына қажетті жағдай жасауға бағытталған.

Жоспар бойынша Алматы мен Түркістандағы әскери қалашықтардың құрылысын 2027 жылдың соңына дейін аяқтау көзделген. Бұдан бөлек, ұлттық ұланның тағы жеті нысанын күрделі жөндеуден өткізу бойынша келісімшарттар жасалған.

Петропавл қаласындағы ұлттық ұлан академиясында да құрылыс жұмыстары жалғасып жатыр. Мұнда мәдени-демалыс орталығы мен бассейні бар спорт кешені салынып жатыр.

Әскери инфрақұрылымды дамыту ұлттық ұланның материалдық-техникалық базасын нығайтуға және әскери қызметшілердің кәсіби даярлығы мен тұрмыс жағдайын жақсартуға бағытталған.

Президент өз жолдауында 2027 жылды Құрылыс жылы деп жариялады.