СҚО-да әкімдік қызметкері өзіне қол салмақ болды

Солтүстік Қазақстан облысында аудан әкімдігінің 62 жастағы қызметкері сірке қышқылын ішіп, өзіне қол жұмсамақ болған. Оқиға орнынан оның қоштасу хаты табылған, деп жазады Kursiv.Media Tengrinews-ке сілтеме жасап

Оқиға 3 қарашада Мағжан Жұмабаев ауданында болған. Әлеуметтік желіде мемлекеттік қызметкер аудан әкімдігінде жүргізілген қаржылық тексеріске байланысты осындай қадамға барған деген ақпарат тарады. Алайда әзірге оның әрекеті мен тексеріс арасында байланыс бары ресми түрде расталған жоқ.

Облыстық полиция департаментінің баспасөз қызметі дерек бойынша сотқа дейінгі тергеу басталғанын хабарлады.

«3 қарашада аудандық ауруханаға улану белгілері бар 62 жастағы жергілікті тұрғын жеткізілді. Оқиға орнынан сірке қышқылы құйылған бөтелкелер мен қоштасу хаты тәркіленді. Қазір тергеу аясында қажетті амалдар жүргізіліп, оқиғаның себептері мен мән-жайы анықталып жатыр», – деп хабарлады полиция департаментінің баспасөз қызметі.

Қазір әйел жансақтау бөлімінде жатыр.