Қытай Ормұз бұғазы бойынша Иран және Сауд Арабиясымен келіссөз жүргізіп жатыр

Қытай Ормұз бұғазы арқылы кеме қатынасын қалпына келтіру жөнінде кешенді шешім әзірлеу үшін Иран, Сауд Арабиясы және аймақтағы басқа елдермен келіссөз жүргізіп жатыр. Бұл туралы Қытай сыртқы істер министрлігінің ресми өкілі Мао Нин мәлімдеді, деп хабарлайды Kursiv.Media.

Оның айтуынша, Таяу Шығыстағы жағдай шиеленіскен тұста Бейжің Сауд Арабиясы, Иран және өңірдегі басқа мемлекеттермен байланыс пен диалогты нығайтуға дайын.

Мао Ниннің сөзінше, Қытай сыртқы істер министрі Ван И Эр-Рияд пен Тегераннан келген ұлттық қауіпсіздік мәселелеріне жауапты өкілдермен кездесіп, Парсы шығанағы мен Таяу Шығыстағы ахуалды талқылаған.

Тараптар аймақтағы тұрақтылықтың жергілікті елдер мен халықтардың әл-ауқаты үшін ғана емес, халықаралық энергетикалық жеткізілімдер мен жаһандық қауіпсіздік үшін де маңызды екенін атап өткен.

Қытай тарапы төраға Си Цзиньпиннің Таяу Шығыста бейбітшілік пен қауіпсіздікті қамтамасыз етуге бағытталған бастамаларын ілгерілетуді жалғастырмақ.

«Қытай объективті әрі әділ ұстанымын сақтай отыра, Иран мен АҚШ-ты келіспеушіліктерді келіссөз арқылы шешуге шақырады. Сондай-ақ Йемен мәселесін саяси жолмен реттеуге және Ормұз бұғазын ашу жөнінде сенімді әрі кешенді шешім табуға ықпал етеді», – деді Мао Нин.

Оның айтуынша, қазіргі басты міндет – Таяу Шығыста әскери қақтығыстардың қайта басталуына жол бермеу. Бейжің аймақ елдері өзара құрмет пен тату көршілік қағидаттарын ұстанып, тұрақты қауіпсіздік жүйесін бірлесіп қалыптастырады деп үміттенеді.

ТАСС хабарлағандай, Мао Нин Сауд Арабиясы мен Иран Си Цзиньпиннің бастамаларын жоғары бағалап, аймақтағы тұрақтылықты қамтамасыз етудегі Қытайдың сындарлы рөлін қолдауға дайын екенін де айтты. Эр-Рияд пен Тегеран 2023 жылы Қытайдың арағайындығымен жасалған дипломатиялық қатынастарды қалпына келтіру туралы Бейжің келісімінің қағидаттары негізінде барлық мүдделі тараппен диалог жүргізуге ниетті.

Иран осыған дейін Ормұз бұғазына егемендік беруді сұраған.